Пихтовка гуртын удмурт кылэз азинтонъя ужрад ортчиз

16-тӥ куарусёнэ Вотка ёросысь Пихтовка гуртын ужамы. Татын огазеяськонмылэн ёрос но кар кивалтӥсьёссы понна семинар-совещание радъямын вал. Огазьын сюлмаськытӥсь юанъёсты эскерим, ужан амалъёсты учким. Валтӥсез пӧлын котьку сямен анай кылэз но удмурт лулчеберетэз азинтон.Люкаськем калыкез пумитаса вераськиз йӧскалык политикая министр Эдуард Петров. Со таиз ар понна лэсьтэм ужъёсты пусйиз, выль вормонъёсты вераз.Трос гинэ ӵектосъёс улонэ пыӵало ке но, ужрадъёс ортчыло ке но, берло аръёсы удмурт кылэз утён туж лэчыт сылэ. Туж сюлмаськытэ лыдӟиськон юртъёс бордын ужась удмурт центръёслэн пытсаськемзы, со сяна, Почта России урод ужамен, удмурт газет-журналъёс дырыз дыръя уг вуо лыдӟисьёссы доры. Берпуметӥез юан эскеремын вал Россиысь финн-угор калыкъёслэн съездазы но, угось таӵе югдур кылдэмын мукет улосъёсын но. "Удмурт Кенеш" огазеяськонлэн Тӧроез Андрей Ураськин кыл кутӥз, таиз но, мукет юанъёслы но нимысьтыз саклык висъялоз шуыса. Котькудӥз уж радлыкез кулэ каре, мерлыко огазеяськонъёс, ёрос администрациос, вылӥ кивалтэт кенешыса ужаны кулэ шуиз со.Туала арын удмуртлыкмес утьыны трос луонлыкъёс но амалъёс кылдытэмын, зэм но. Одӥгез - со проектъёс бордын ужан. "Удмурт нылкышно кенеш" огазеяськонлэн кивалтӥсез Елена Миннигараева пусйиз, "Пичи Чеберайёс но Батыръёс" вожвылъяськон пичи пиналъёслэсь быгатонлыкъёссэс шараясь площадка луэ шуыса, удмурт кыллы яратон пыӵатэ, калык сямъёсын соосты тодматэ, будӥсь пиналъёсты ас шаерзэс, историзэс гажанлы дышетэ. Та вакытэ нош ик выль сезонзэ усьтэ кык кылэз тодӥсь пиналъёслы "Билингва" центр. Кузебай Герд нимо гимназиысь валтӥсь визьнодась Светлана Зинкова валэктӥз таиз площадка юри анай-атайёсын ӵош ужан понна кылдытэмын вал шуыса. Уго анай кыл, нырысь ик, вордӥське семья пушкын, нылпиос шӧдо анай-атайзылэсь мылкыдзэс, соос адӟо, асьсэос анай-атайёс гажало-а кылзэс.Котькуд ёрос ёзэтъёсмы но трос кужымзэс сёто удмурт кылэз но лулчеберетэз утён понна, сое азинтыны инъет кылдыто. Асьсэлэн шумпотонъёсынызы но, сюлмаськонъёсынызы люкиськизы Вотка но Вавож ёрос ёзэтъёсмылэн кивалтӥсьёссы Феня Рафаиловна но Ирина Ложкина.Вуоно арлы но ужпумъёс пуктэмын. Уго 2026-тӥ ар "Удмурт Кенеш" огазеяськон котырес лыдпуссэ - 35 ар тырмонзэ - пусъёз. Озьы ик Вань удмуртъёслэн бадӟым ӧтчамзы ортчоз. Котькуд ёзэтъёс берло 4 ар ужамзылы йылпумъянъёс лэсьтозы, быръёнъёсъя конференциос радялозы. Нош та дыре книга бордын уж мынэ ни, отчы огазеяськонлэн историез, ёзэтъёслэн али дыре ужамзы, удмурт калыклэн туала арын улонэз сярысь ивортонъёс пырозы. Книга юбилейлы вуттыны чакламын.Пумиськон улсын ик "Пихтовка" чорыг вордонъя хозяйстволэн кивалтӥсез Георгий Крылов предриятилэн уженыз тодматӥз, йӧскалык ӵектосъёсты улонэ пыӵатон пумысен мылкыдзэ вераз. Кӧня ке ар талэсь азьло Пихтовкаын пыӵатэмын "Деревня будущего" проект: сюресъёс асфальтэн валемын, школа но спортзал выль тӥрлыкен но оборудованиен узырмытэмын, туала стадион но ФАП пуктэмын, нош автобус дугдылон остановкаын вай-фай ялан ужа. Чылкак выжыкылын кадь, но татын улӥсьёслэн со нуналлы быдэ пумиськись огшоры тодметъёс. Азинскон амалъёсты санэ басьтӥм.Ужмес йылпумъямы Кукуи черкогуртын, отын Удмурт лулчеберетъя центрлэн уженыз тодматским, Вотка ёросын возиськись сям-йылолъёсты учким.

Наталья Михайлова