Удмуртиысь делегация егитъёслэн калыккуспо фестиваляз пыриськиз

Удмуртиысь делегация егитъёслэн калыккуспо фестиваляз пыриськиз

Екатеринбургын егитъёслэн калыккуспо фестивальзы ортчиз. Со 191 кунъёсысь 10 сюрс адямиосты огазеяз. Удмуртилэн делегацияз 51 мурт пыриз — со студентъёс, егит ӧнерчиос но творческой огазеяськонъёслэн ёзчиоссы. Ужрад Россиысь калыкъёслэн огъя луэмзылэн арезлы тупатэмын вал. Программа «Россия – страна возможностей для молодёжи», «Единство народов», «Партнёрство во имя взаимного развития» но «Вместе за справедливый мир» темаосъя радъямын вал. «Лулчеберет кварталын» пыриськисьёс вить макрорегионъёсын тодматскизы. «Азия» драконъёсын парадэн, иммерсивной спектакльёсын но корей поп шулдыръяськонэн паймытӥз. «Африка» барабанъёсын шоу, йӧскалык шудонъёс но эктонъёсъя мастер-классъёс ортчытӥз. «Ближний Восток» шундыӝужан крезьгурен но кылбуранэн тодматӥз, «Караван надежды» шествие но «1000 и 1 ночь» крезьгуро выжыкыл возьматӥз. «Америка» карнавальной флешмоб, эктонъя марафон но самбоя мастер-классъёс радъяз. «Европа» Россилэсь трос пӧртэмлыко луэмзэ адӟытӥз — арган шудэмъя кырӟанъёс, казак шулдыръяськонъёс но йӧскалык крезьгуро инструментъёс. Фестивальын элькунысь делегация пӧртэм мастер-классъёс ортчытӥз. Одӥгаз перепеч пӧраны дышетӥзы. Ижкарысь кузпалъёс Ирина но Алексей Вотинцевъёс «Гастрономическая карта России» ӵектослэн командаеныз удмурт калык сиёнэн куноятӥзы. «Евразия» стендын «Брангурт песянайёс» мукет кунъёсысь куноосын «Катюша» кырӟанэз быдэстӥзы. Удмуртиысь студентъёслэн отрядъёссы фестивальын волонтёръёс вал, ужрад сярысь мерлыко вотэсъёсы гожъязы, озьы пассажир вагонъёсын проводникъёс луыса ужазы, куноосты, пыриськисьёсты но радъясьёсты утялтӥзы. Удмуртиысь делегацие пыриськиз Шарканысь блогер, туспуктӥсь, трос нылпиё анай Ксения Широбокова. Калыкъёслэн эшъяськон юртысь ӧнерчиосын кылдытэм «Маршрут построен! Удмуртия многонациональная» блог-туре нырысь Ксения туспуктӥсь луыса пыриськиз, нош таяз арын быдэс семьяеныз контент бордын ужазы. Кузпалэныз но нылпиосыныз блогер удмурт шаерез котыртыса тунсыко контент пормытӥз. Ужез выли дунъямын вал, 113 сюрс куриськонъёс полысь Ксенияез бырйизы. Озьы, Шарканысь удмурт блогерлы луонлык кылдӥз быдэс дуннеысь егитъёсын пумиськыны но тодон-валанъёссэ муромытыны. Оскиськом, азьланяз удмурт шаермес Ксения эшшо но узырлыкогес возьматыны быгатоз шуыса.

Туспуктэм: Ксения Широбоковалэн ВКонтакте вотэс бамысь