Башкортостанлэн дано удмурт пиез

Бадӟым удмурт. Тазьы нимало вал Башкортостанын Ренат Биктимирович Галямшинэз. Сое буре вайыса, Выль Татышлы гуртын сӥё-дано синпелет усьтӥзы.

 Ренат Биктимировичез юнме уг нимало вал бадӟым удмурт шуыса. Та адями нюлэс возёсын станокен ужась ӧнерчиысен - азинлыко возёс кивалтӥсь дорозь будӥз. Со сяна туж уно лэсьтӥз Башкириысь удмуртъёсты "сайкатон" ӧрын, верантэм трос лэсьтӥз соосты огазеян понна.

 Удмурт калыклэсь лулчеберетсэ, кылзэ, сям-йылолъёссэ утёнлы, азинтонлы, калыклэсь данзэ ӝутонлы вань кужымзэ понӥз. Ренат Биктимировичлы луыса ик Башкортостанын кылдытэмын вал удмурт йӧскалык центр, кудӥз туннэ нуналын но туж азинлыко ужа.

 Ренат Биктимирович Галямшин - Башкортостанлэн дано удмурт пиез, Россиысь гурт удысысь сӥё-дано ужась, Кузебай Герд нимо йӧскалык премилэн лауреатэз, Калыкъёслэн эшъяськон ордензылэн но "Трокай Борисов 1891-2011" медальлэн кузёез.