Усто проектъёсты пусйизы

7-тӥ гудырикошконэ Удмурт Элькунысь Кивалтэтлэн юртаз экономикая министр Анна Слугина тужгес усто ӵектосъёсты улонэ пыӵатӥсь коммерциен герӟаськымтэ огазеяськонъёсын пумиськылӥз.

Анна Слугина пусйиз, огазеяськонъёс вылӥ дунъет басьтӥзы ӵектоссылэн мерлыко пайдалыкез но азязы пуктэм ужпумъёссэс ӟечлыко бытэстэмзы понна.

Йылпумъянъёсъя вормисьёс "топ-10" лыдметэ пыризы. Быръемын вал 2022-тӥ но 2023-тӥ аръёсы быдэстэм мерлыко ӵектосъёс.

Тужгес усто проектъёс пӧлын удмуртъёсыз но - "Удмурт Кенеш" огазеяськонмылэн "Этнолаборатория семейных традиций "Кӧкы" ӵектосэз. Тау кариськом Пичи Пурга ёросысь ёзэтмылэн кивалтӥсезлы Надежда Степановалы но солэн мыло-кыдо командаезлы: Наталья Михайловалы, Владимир Ботниковлы, Галина Глуховалы, Богдан Анфиногеновлы, Нина Бехметовалы, Людмила Коконовалы, Вера Савельевалы, Римма Лопатиналы.

Озьы ик вормисьёс луизы - Артэ центрлэн "Музей-лаборатория народов Удмуртии" проектэз, Куара огинлэн "Школа удмуртских блогеров" проектэз, Вотка ёросысь шаертодосчиослэн огазеяськонзылэн "Даур дэрем" проектсы.

Ӟечкыласьком! Выль малпанъёс тӥледлы, малпанъёстэс улонэ пыӵатыны бадӟымесь луонлыкъёс!

Наталья Михайлова.