Семён Виноградовлэн ужъёсыныз «Родное» адӟытон ужа Чеберлыко киужъёсъя йӧскалык центрын

Семён Виноградовлэн ужъёсыныз «Родное» адӟытон ужа Чеберлыко киужъёсъя йӧскалык центрын

15-тӥ куарусёнэ Ижкарын Чеберлыко киужъёсъя йӧскалык центрын Удмуртиысь калык суредасьлэн Семён Виноградовлэн ужъёсыныз «Родное» адӟытон усьтӥзы. Ужрад усточилэн 90 арес тырмемезлы сӥземын.

Возьматонэ Семён Николаевичлэн семьяяз утиськись буёлэн быдэстэм суредъёсыз, графика ужъёсыз пыризы, соосты учкисьёс нырысьсэ адӟозы. Озьы ик кылем даур шорын Казаньын но Москваын дышетскон вакытаз ӵыжы-выжыосызлэн но гуртоосызлэн карандашен но акварелен лэсьтэм этюдъёсыз поттэмын.

Суредасьлэн ужъёсаз валтӥсь темаез – огшоры удмурт адямилэн улонэз. Ӵемысьгес валтӥсь инты басьтэ кышномурт – со черсыса пуке, табань пыже, шур дуре вулы мынэ.

«Удмурт калыклэн лулпуш улонэз монэ вордскемезлэн нырысетӥ нуналысеныз паймытэ. Мон киын лэсьтэм тэбетэ вордски. Пужыятӥськемъёс, вуж дэремъёс – со мынам тэбетъёсы вал. Со «пленысь» мон улытозям уг мозмытскы ни», – вераз Семён Виноградов.

Удмурт суредасьлэн ужъёсыныз адӟытон учкисьлы дышем макеос шоры выль сямен учкыны, ортчемзэ тодэ вайыны юрттэ. Со учкисез ас калыкеныз адскисьтэм нюжаосын герӟа, солэсь кылёсбурзэ гажан мылкыд пыӵатэ. Со ик адямилэсь лулпушлыксэ азинтонлэн инъетэз луэ.

«Семён Николаевичен вераськыса, валаськод, со туж бадӟым адями, та дуннее аслаз миссиеныз лыктӥз, кудӥз пумозяз быдэстымтэ на. Милям тау кареммы потэ Удмурт Элькунлэсь лулчеберет кылёсбурзэ, суредан устолыке ватсэт пыртэмды понна. Туж умой, юбилей арады Центрамы адӟытон лэсьтыны быгатӥмы шуыса. Тӥляд творчестводы – со вордскем музъемлэн зэмос летописез, кудӥз яратонэн, югытэн но шунытэн тырмемын», – пусйиз Чеберлыко киужъёсъя йӧскалык центрлэн кивалтӥсез Любовь Лихачёва.

Семён Виноградов калыктодосэз но суредан устолыкез огазея. Этнографической экспедициосъя удмуртъёслэн йӧскалык дӥсьсыя но пужыоссыя книгаос поттӥз. Удмурт кун университетын Устолыкъёсъя но дизайнъя институтын буёлэн суреданъя кафедра кылдытӥз но 10 ар соин кивалтӥз.