Удмуртиысь, Пермь шаерысь, Татарстанысь но Комиысь дизайнеръёс йоскалык шӧдмо дӥьскут бичетъёсыны тодматӥзы

Удмуртиысь, Пермь шаерысь, Татарстанысь но Комиысь дизайнеръёс йоскалык шӧдмо дӥьскут бичетъёсыны тодматӥзы.

Удмуртиын Йӧскалык дӥсьлэн нуналэз азьын йӧскалык дӥсь бичетъёсты возьматон ортчиз. Ужрад элькунысьтымы, озьы ик Пермь шаерысь, Татарстанысь но Комиысь дизайнеръёсты огазеяз. Соос 12 дӥсь коллекциосынызы тодматӥзы.

Ижкарысь дизайнер Любовь Суднева «Шу» бичет дасяз. Солэн кык пуштросэз. Шу – со удмурт ягода, калина. Озьы ик ӟуч кылэ берыктыны ке, «шу» – со вера. Дӥсь бичетэз кылдытон бордын дизайнер куинь арня пала ужаз.

Эгра ёросысь модая «Питыран» калык театре ветлсь пиналъёс асьсэлэсь горд бичетсэс возьматӥзы. «Соос вайизы коллекция, «Бурлат» нимаське. Милям сыӵе тема фуфайки, нулло вал азьвыл сыӵе шуныт дӥськутъёс. Быдэс арез ужамы, вуриським, сыӵе подиум постановка лэсьтӥмы. Пиналъёс туж шумпото, что таӵе празднике пыризы, быгато ужзэс возьматыны. Туж шумпотӥськом соин», - вера Надежда Касаткина, модая «Питыран» калык театрен кивалтӥсь.

Татарстанысь дизайнер Ильдар Шангараев Казаньын XIX-XX дауръёсы улэм бигеръёслэсь дӥсь люкетъёссэс стилизовать кариз. Бичет «Мои праматери» нимаське.

Ужъёсаз дизайнер векчи весен (бисерен), зарни сӥньысъёсын пужыятон амалъёсты кутэ. Бичетъёсты возьматон йӧскалык модалы сӥзем арнялэн люкетэз луиз. Со дыр ӵоже элькунын мастер-классъёс, котырес ӝӧкъёс, лекциос радъяськизы.

«Та ужрадэн, та форматэн, искусствоен туннэ нуналлы туж трос тунсыкъясько егитъёс. Со туж шумпотымон, малы ке шуоно соос, одӥг ласянь, культуразэс утё, кылзэс, соос шӧдо, калыклэн выжыез луо шуыса. Мукет сямен, соос асьсэды возьмато, как формат самореализации луэ. Соин ик татын адӟиськом, арысь аре тунсыкъяськон будэ шуыса», - пусйиз Юлия Шахтина, Удмуртиысь Калыкъёслэн эшъяськон юртэнызы кивалтӥсь.

Йӧскалык мода возьматэ, калык дӥсь музейысь экспонат ӧвӧл шуыса. Солы туала шӧм пыӵатыны но огшоры улонын нуллыны луэ. Таӵе ужрадъёс адямиослы выжыосынызы герӟаськемзэс шӧдыны, мукет калыкъёслэн лулчеберетэнызы тодматскыны сёто. Со валтӥсь ужпум луэ 2026-тӥ арын, кудзэ азьмурт Владимир Путин Россиысь калыкъёслэн огъя луэмзылэн ареныз ялӥз.