Калыктодосэз утён но азинтонлы сӥзем «Владыкин лыдӟонъёс» радъяськозы

Калыктодосэз утён но азинтонлы сӥзем «Владыкин лыдӟонъёс» радъяськозы

14-тӥ куарусёнэ Удмурт кун университетлэн В. А. Журавлёв нимо лыдӟиськоннияз удмурт тодосчиослы сӥзем «Владыкин лыдӟонъёс» ортчозы. Ужрадэ удмурт лулчеберетэз, этнографиез но фольклорез эскерисьёс люкаськозы. Со сярысь Удмуртиысь тӧролэн но кивалтэтлэн пресс-службазы ивортӥз.

Форуме пыриськыны ӧтё вылӥ дышетсконниосысь дышетӥсьёсты но тодос ужасьёсты, студентъёсты но аспирантъёсты, этнография но фольклористика ӧръёсысь ӧнерчиосты.

Лыдӟонъёс истори тодосъёсъя докторлэсь, профессорлэсь Владимир Владыкинлэсь но кылосбур тодосъёсъя докторлэсь, профессорлэсь, фольклористлэсь Татьяна Владыкиналэсь тодосъя, историяя но лулчеберетъя кылёссэс вӧлмытонлы сӥземын. Радъясьёс калыктодосэз утён но азинтон понна лулчеберет но академ огазеяськонъёслэсь кужымзэс огазеяны ужпум пукто.

Программаын теоретической докладъёсын но экспедициослэн ужъемышъёсынызы тодматозы.

Туспуктэм: Ивортодэтъя «Удмуртия» агентство