«Капля жизни» ужрад ортчиз Ижысь Вормонлэн сквераз

«Капля жизни» ужрад ортчиз Ижысь Вормонлэн сквераз

Терроризмен нюръяськонлы сӥзем акция шаерамы радъяськылэ 2018-тӥ арысен. Котькуд ар трос калык пыриське: кадетъёс, школае ветлӥсьёс, анай-атайёс, дышетӥсьёс, кивалтӥсьёс, мылкыд карисьёс. Та акциез малпазы Калыкъёслэн эшъяськон юртысь ужасъёс. Туннэ нуналлы буре ваён ужрад быдэс Россиын вӧлмемын.

— Малпаськомы вал, терроризм кытын ке кыдёкын шуыса, — вераз Иж город администрацилэн йырызлэн воштӥсез Наталья Гвоздкова. — Янгышаськеммы. Со вӧзамы ик вылэм! 2022-тӥ арын 26-тӥ сентябре Ижысь 88 номеро школаын кӧшкемыт учыр луиз: террорист 18 адямилэсь — нылъёслэсь но пиослэсь, анай-атайёслэсь но школаын ужасьёслэсь — улонзэ уретӥз! Та нунал сюлэмъёсамы бадӟым вурыс кельтӥз. Со туннэ но вирӟектэ, висьытэ, асьмеды сак кариськыны куре: терроризм пытьыосмы кузя вамышъя, нылпиосмы котырын берга. Сьӧсьёс туала пиналъёсты умой шӧдо — сетьёс но мессенджеръёс пыр кырсь ужъёсазы валто. Соин ик асьмелы валче кариськоно, котьку сак улоно!

Люкаськемъёс, терактъёсын быремъёсты буре вайыса, шыпыт сылӥзы, Ялан ӝуась тыл доры сяськаос понӥзы. Собере вуэз, кырымазы кутыса, сяськаос вылэ кисьтазы. Тодазы вайизы 2004-тӥ арын Уйпал Осетиысь Беслан городысь 1 номеро школаез. Соку шимес учыр онгромытӥз быдэс кунмес: террористъёс быдтӥзы 334 адямиез, та пӧлысь 186-ез — нылпиос, самой покчиезлы 6 толэзь сяна ӧй вал.