Калыкъёслэн эшъяськон юртазы Огъяросси диктант гожтӥзы

«Россия — дом народов» нимын диктант гожъян ужрад Россиысь калыкъёслэн кылъёссылы сӥзем нуналлы кичолтэмын вал.

2020-тӥ арысен сое радъяло Выжы калыкъёслэн ужпумъёссыя агентство, Россиысь Калыкъёслэн юртсы, озьы ик «Рувики» интернет-энциклопедиез лэсьтӥсьёс. Туэ диктант ортчиз Калыкъёслэн эшъяськонзылы сӥзем арез пусъён улсын. Сое гожтыны мылкыд карисьёс понна 88 улосъёсын 7 сюрс 600 площадкаос усьтэмын вал. Ижкарын диктант гожтизы удмурт но зуч кылын.

Диктантлэн текстэз дасямын вал Расул Гамзатовлэн анай (авар) кылыз но ӟуч кыл сярысь гожъямъёсызъя. Со шуылӥз: та 2 кылъёс, 2 анайёсы кадь. Диктант берыктэмын вал 21 кылэ — удмуртэ но. Калык эшъяськон юртэ диктант гожтыны лыктӥзы 90-лэсь ятыр адямиос: депутатъёс, кивалтӥсьёс, калык огазеяськонъёсысь азьветлӥсьёс, студентъёс, Ижысь 72 но 57 номеро школаосын дышетскисьёс.

— Удмуртиын улӥсьёс диктантэз арлы быдэ мылысь-кыдысь гожъяло, — шуиз йӧскалык политикая министр Эдуард Петров. — Уката шумпотымон: сое удмурт кылын гожтыны луоз. Мукетыз но пусйымон: диктант гожтыны мылкыд каро егитъёс но. Удмурт кылмы уз быры шуыса оскон кылдэ.

Ужрадэз ортчытыны юрттизы этноволонтеръёсмы.

Кӧня балл люканы быгатӥз адями — ивор вуоз 30-тӥ сентябрёзь.