Гожъяськись Елена Миннигараева выль книгаеныз тодматӥз

Удмуртиысь йӧскалык лыдӟиськоннилэн «Удмурт шаер» клубаз 25-тӥ гудырикошконэ тунсыко пумиськон ортчиз: гожъяськись, «Удмурт дунне» газетлэн валтӥсь редакторез, «Удмурт нылкышно кенеш» огазеяськонлэн тӧроез Елена Миннигараева выль книгаеныз тодматӥз.

«Сайкатэ монэ, рай вуиз ке» книга гожъяськисьлэн витетӥез ни. Отчы азьвыл потэм «Мумы» но «Сайкатэ монэ, рай вуиз ке» повестьёсыз но «Шунды но ӝужа но…» выль повестез пыризы. Чеберлыко литературая «Кенеш» журналлэн валтӥсь редакторез Анастасия Шумилова пусйиз, Елена Миннигараевалэн ужъёсыз юн герӟасько туннэ нуналлэн. Татын авторлэн журналистика удысын трос аръёс ӵоже ужамез шӧдӥське, луоз.

«Вылез повесть сярысь верано ке, отын туала югдуръёс возьматэмын. Кылсярысь, спецоперацилэн кутскемез но, пандемия но, кызьы соос воштӥзы калыклэсь улонзэ. Но маиз дуноез: автормы удмурт автор бере, со возьматэ ӵапак асьме дуннемес, асьме пичи музъеммес, кызьы, шуом, пандемия воштӥз удмурт адямиослэсь улонзэс. Тани туала улонын туж бадӟым инты басьто соцсетьёс, вотэс. Со возьматэ, кызьы со ваньмыз воштэ асьмелэсь улонмес. Возьматэ сое ӟеч палъёссэ но, дыр, но тросгес урод палъёссэ но. Но со дыре ик со геройёссэ но, солэн туж трос геройёсыз, со соосты курласа уг возьматы, со соосты жаля. Со тросгес курла, дыр, кылдэм югдурез-а, утча мугъёссэ со югдуръёслэсь » Анастасия Шумилова, «Кенеш» журналлэн валтӥсь редакторез Литературатодосчи, педагогика тодосъя кандидат Любовь Перова пусйиз, Елена Миннигараева удмурт проза удысэз пӧртэм жанръёсын узырмытӥз. Со гожтӥз детектив но («Сьӧд сюлык»), фэнтези но («69 ар ортчыса, яке Кытчы кошко дэймонъёс?»)), озьы ик вань солэн лирической прозаез но («Мумы»). «Шунды но ӝужа но…» повесть выжыкыл куронъёсъя гожтэмын, лыдъя тодосчи.

Нырысь героиня шудо улэ, собере шугъяськонъёсын пумиське, соосты вормыны юрттӥсьёсты пумита. Но повестьлэн пумыз огшоры ӧвӧл: лыдӟись ачиз малпаны, йылпумъян лэсьтыны кулэ, шедьтэ-а нылмурт аслэсьтыз шудзэ, уг-а. « Котькуд жанрлэн вань аслаз куронъёсыз, и со одӥг дышем сюрестӥ уг мыны, утча кыче ке но выль приёмъёс, выль сюжетъёс, выль жанръёс. И малпаське, котькуд арлыдо но тусо лыдӟисьёс мед шедьтозы асьсэлы удмурт кылын гожтэм книга. Вот со понна мон сое ӟечкыласько но паймисько солэн утчаськемезлы. <…> Та повестьёсын шока туала вакыт. Ортчизы ке но трос аръёс, асьмеос тодомы, кыӵегес вакытэ гожтэмын та. Со тодметъёс немыз понна гинэ пыртэмын ӧвӧл, соосын герӟаськемын валтӥсь сюжетъёс но валтӥсь конфликтъёс», - Любовь Фёдорова, литературатодосчи Ӵемысь лыдӟисьёс Елена Миннигараевлэн произведениосысьтыз асьсэдыз тодмало яке отын зэмос адямиос сярысь гожтэмын шуыса малпало.

Автор мыняса вераз, кызьы солэсь юало, кыӵе улэ ни ай книгаысь соиз яке таиз героез, мар соослэн вылез шуыса.

Иворъес вотэслэн бамысьтыз