Россилэн куншетэзлэн нуналэзлы сӥзем автопробег ортче Удмуртиын

21-тӥ гудырикошконэ Ижкарын Россилэн куншетэзлэн нуналэзлы сӥзем «Наша сила – в единстве народов России» автопробег кутскиз.

Кык нунал ӵоже пыриськисьёс Ижкар – Кизнер – Грак – Алнаш – Каракулино – Ижкар маршрутэз ортчозы. Со сярысь элькунысь Кун Кенешлэн пресс-службаез ивортӥз. Автопробег азьын митинг ортчиз. Люкаськемъёс Ялан ӝуась тыл доры сяська понӥзы но бырем ожгарчиосты одӥг минут ӵоже чус сылыса буре вайизы. Машинаос карысь Вормон скверысь вырӟизы. Колоннаысь куинь йыр машинаос тӧдьы, лыз но горд буёло.

«Куинь буёло куншетмы кунлэсь мылкыдъёссэ утён символэз котьку но вал. Туннэ ожгарчиосмы сое нимысьтыз ожгар ужрад мынон зонаын мозмытэм интыосын данъяськыса ӝуто. Ми огъя, улосчиосмес обидьыны ноку ум сётэ. Автопробег кутске Ож но уж данлыкъя монумент дорысен, кытын Быдӟым Атыкай ож аръёсы шаермес утем муртъёслэн нимъёссы гожтэмын. Ми азьлозэ тодамы возиськомы но вуоноез понна тыршиськомы», - Владимир Невоструев, Удмуртиысь Кун Кенешлэн тӧроез.

Автопробеге пыриськисьёсты 22-тӥ гудырикошконэ Шор карлудын пумиталозы. Отын праздниклы сӥзем бадӟым концерт ортчоз.