Ижкарын «Добрая Удмуртия» фестиваль ортчиз

22-тӥ гудырикошконэ Ижкарын Россилэн куншетэзлэсь нуналзэ пусйизы. Праздник улсын «Добрая Удмуртия» фестиваль ортчиз.

«Та праздник возьматэ: ми дорын уно калыкъёс, пӧртэм осконъёсын адямиос уло ке но, ми – огазе! Туннэ асьмеос тодамы вайиськомы соосты, кин Вормонэз матэктытӥз, кин али нимысьтыз ожгар ужрадэ пыриське. Ожгарчиосмы выль интывылъёсты мӧзмытэ но куншетмес ӝуто», – пусйиз Удмуртиысь йӧскалык политикая министрлэн воштӥсез Александр Филатов.

Шор карлудын элькунысь волонтёръёслэн 20 огазеяськонъёссы ужазы. Соос карын улӥсьёс но куноос понна пӧртэм шудонъёс но мастер-классъёс ортчытӥзы.

Сцена вылын карысь артистъёс но коллективъёс яркыт концерт возьматӥзы. Со сяна, волонтёръёсты данъян ортчиз. Шор карлудын «Живой флаг» акция радъяськиз: Россилэсь бадӟым куншетсэ кыскизы. Программаез Россиысь калыкъёслэн огъя луэмзылы сӥзем блок азьланьтӥз. Праздникез пусъён Пермьысь «РОССО» группалэн концертэныз йылпумъяськиз.

Ужрадын огазеяськон мылкыд кузёяськиз. Котькуд мурт ассэ бадӟым кунлэн люкетэныз шӧдӥз. Со тужгес но дуно луэ 2026-тӥ арын, кудзэ азьмурт Владимир Путин Россиысь калыкъёслэн огъя луэмзылэн ареныз ялӥз.