Выль емышъёслы сӥзем йӧскалык шулдыръяськон ортчиз

Ижкарысь Космонавтъёслэн парказы выль емышъёслы сӥзем йӧскалык шулдыръяськон ортчиз. Ужрад туэ Россиысь калыкъёслэн огъя луэмзылэн арез улсын радъяськиз. Соин ик парк эшъяськонлы сӥзем бадӟым площадкалы пӧрмиз, котькудӥз быгатӥз Удмуртиын улӥсь калыкъёслэн сям-йылолъёсыныз тодматскыны.

Люкаськем калыкез праздникен ӟечкылазы Росси Кун Думаысь депутат Олег Гарин, Удмурт Элькунысь Кун Кенешлэн Тӧроезлэн воштӥсез Татьяна Ишматова, Ижкар Думалэн тӧроез Любовь Зайцева, Вань удмуртъёслэн "Удмурт Кенеш" огазеяськонзылэн Тӧроез Андрей Ураськин, Йӧскалык политикая министерствоысь калык кусыпъёсты умоятонъя ёзэтлэн кивалтӥсез Александр Корепанов но мукет мер огазеяськонъёслэн кивалтӥсьёссы.

Праздникын удмурт, ӟуч, бигер, мордва но пор йӧскалык азбаръёс ужазы. Отын возьматэмын вал калык дӥськутъёс, корка тӥрлыкъёс. Татын ик веръяны луиз пӧртэм йӧскалык сиён-юонъёсты но. Озьы ик котькудӥз азбарын выль кеньырлэсь ӝук пӧзьтӥзы. Кылсярысь, удмуртъёс кӧня ке пӧртэм кеньыръёслэсь ӝуксэс пӧрмытизы, бигеръёс тари кеньырлэсь ӝукен куноязы, ӟучъёс сьӧдчабез губиен но курегпузэн сураса "Сименуха" лэсьтӥзы. Озьы ик нунал ӵоже удмурт азбарын табань пыжонъя мастер-класс ужаз.

Мылкыд карисьёс мукет мастер-классъёсы но пыриськыны быгатӥзы. Шулдыръяськон возьвылын йӧскалык шудонъёс но ӵошатсконъёс радъяськизы. Дышем сямъя ини чеберлыко куижъёсын адӟытон-вузкарон ужаз. Озьы ик сад-бакча возисьёс будэтэм емышъёссэс возьматӥзы.

Валтӥсь сцена вылын йӧскалыккуспо концерт ортчиз. Отчы пыриськизы элькунысьтымы лулчеберетъя йӧскалык огазеяськонъёс бордын ужась коллективъёс. Озьы ик люкаськем калыкез шулдыртӥзы Пермьысь куноос - "Иваны" ансамбль.

Тау кариськом вань ёзчиосмылы, озьы ик нимысьтыз Удмурт Элькунлэн Кун Кенешысьтыз депутатлы, "Домашняя кухня" огазеяськонлэн кивалтӥсезлы Андрей Фефиловлы ужрадэз радъяны юрттэмзы понна!