Быдэ вуонлы сӥзем «Эру» шулдыръяськон ортчиз

Шаркан ёросысь Зар-Вишур гуртын быдэ вуонлы сӥзем «Эру» шулдыръяськон ортчиз.

Дышем сямъя ини, люкаськем командаос бадӟым улонэ выжыны дась луэмзэс эскеризы. Егитъёс шаплы, чупрес луэмзэс, удмурт сям-йылолъёсты тодэмзэс возьматӥзы, трос вожвылъяськонъёс пыр потыса, асьсэ командазылы баллъёс люказы. Со сяна, котькуд командаысь нылаш но пияш «Кык дыдыкъёс» конкурсэ пыриськизы. Со улсын соос карнанэн ошмесысь ву ворттӥзы, пу вандӥзы но пильылӥзы, табань пыжизы, черсыны быгатэмзэс возьматӥзы.

Пусъём, «Эру» шулдыръяськон арлы быдэ радъяське удмурт егитъёслэн «Шунды» огазеяськонзы кичӧлтэмъя но Шаркан ёрос юрттэмъя, удмуртъёслэсь вашкала сям-йылолъёссэс туала улонэ пыртон, удмуртъёслэсь лулчеберетъя кылёсбурзэс гажан но дунъян мылкыд пыӵатон, егитъёсты ог-огенызы тодматон вылысь.