«Удмурт нылкышно кенеш»-лэн паськытатэм кенешез ортчиз

Нылкышноос люкаськылӥзы Йӧскалык музейын. Правленилэн ёзчиосыз сяна, пумиськонэ вуылӥзы Эшъяськон юртысь, Йӧскалык прессая юртысь ӧнерчиос но.

Вераськон мынӥз огазеяськонлэн берло толэзьёсы улонэ пыӵам ужъёсыз сярысь. Тужгес бадӟым ужрадъёс пӧлын - Ашальчи Оки лыдӟонъёсты дасянэ но радъянэ пыриськон. Туэ конференция удмурт нылкышно гожъясьёслы сӥземын вал.

Огазеяськонлэн кивалтӥсез Елена Миннигараева тау кариз активистъёслы, азьланезлы ужпумъёс пуктӥз.

Вераськемын туэ сӥзьыл но гужем радъяно ужъёс сярысь. Сентябре ини «Пичи Чеберайёс но батыръёс-2026» конкурс-фестиваль ялэмын, мытэмын луоз. Финал - 13 декабре. Со сяна, туэ огазеяськон радъяны чакла нылпи творчествоя «Вай эше, бур кидэ!» фестиваль. Со озьы ик толалтэ ортчоз.

Правленилэн активистъёсыз мыло-кыдо пырисько элькунамы ортчись пӧртэм ужъёсы, вормонъёс басьто: Ижысь воспитательёс пӧлын ортчем «Родной земли краса» вожвылъяськон, одӥгаз номинациын вормисе потӥз Светлана Зинкова, пӧртэм калыкъёслэн спартиакиадаоссы, йырвизез сынанлы сӥзем ӵошатсконъёс («Малпатон») но трос мукет. Пусъемын вал, ёросъёсысь ёзъёсын кивалтӥсьёс но асьсэды ялан шарагес возьмато. Шуом, Глазов ёросысь азьветлӥсь Марина Наговицына «Мисс и миссис Приволжский Федеральный округ» конкурсэ пыриськыса, «1-тӥ вице-миссис ПФО Евразия» номинациез утӥз.

Паськытатэм кенеше ӧтемын вал Кун Кенешысь Тӧролэн воштӥсез Татьяна Ишматова но. Со удмурт кылэз дышетонэн герӟаськем юанъёслы валэктон сётӥз.