Гурт - со, нырысь ик, адямиос!

Арлы быдэ «Удмурт дунне» газет ялэ «Гурт адями» конкурс. Туэ нырысьсэ конкурсын вормисьёс дунъямын вал «Деревня – душа России» фестивальын.

Фестиваль ортчиз Эгра ёросысь Мувыр гуртын. 1992-тӥ аръёсы та бырем гуртэз выльысь улӟытӥз Александр Корепанов. Аслаз семьяеныз ӵош татчы корка пуктӥз. Али та музъем вылын ужа ферма, йӧллэсь продукция поттӥсь мини-завод, Лоза шур дурын – пыжен уянъя станция, спортэн вырон но нылпиосын шутэтсконъя инфраструктура, туристъёслы чаклам сюресъёс, часовня, кемпинг, беседкаос…

Туннэ нунуллы Мувырын 16 корка пуктэмын ини. Та гурт – туристъёсты кыскись интылы пӧрмиз. 2023-тӥ арысен татын отче «Деревня – душа России» фестиваль. Туннэ фестиваль калык эшъяськонллэн арезлы сӥземын вал (ялэмын Президентэн Владимир Путинэн), отчы Россилэн пӧртэм улосъёсысьтыз куноос пыриськизы.

Туэ фестивале пыриськиз «Удмурт дунне» элькун газет но. Татын пусъемын вал газетлэн «Гурт адями» премиеныз дунъям адямиос.

Светлана Белослудцева – Кез ёросысь Александрово школаысь дышетӥсь. Нылпиосты визьнодан сяна, со трос лэсьтэ ёрослэсь но гуртлэсь историзэ утён понна. Ёросъёсысьтызы бырем гуртъёс сярысь материал бича, тодэм-валанзэ пиналъёслы пыӵатэ, удмурт кылэз утись проектъёсын выре.

Диана Шкляева – Эгра ёросысь Зура черкогуртысь трос нылпиё анай. Трос лэсьтэ гуртэзлэсь нимзэ быдэс элькунлы тодмо карон, доразы туристъёсты кыскон понна. Солы луыса, Зураын тодмо кылбурчилы Лидия Черновалы сӥзем музей-юрт возиське, гуртоосты данъясь ужрадъёс ортчо.

«Гурт адями» конкурсэз редакция туэ 15-зэ ортчытӥз ини. Та дыр ӵоже 50-лэсь трос адями пусъемын. Ваньзы соос гуртэз азинтон понна сюлэмзэс сётыса ужало. Гуртысь геройёс тау каро калыклы, бурдъям, азьланяз но ужаны кужым сётэм понна. Нош "Деревня - душа России" фестиваль трос аръёс ӵоже тазьы ик шулдыр мед ортчоз!

"Удмурт дунне"