Гожъялэ удмурт фантастика!

Йӧскалык прессалэн юртэз Издательский дом национальной прессы но «Кенеш» журналлэн редакциез, Удмуртиысь Правительстволэн но Йӧскалык политикая министерстволэн юрттэменызы, «Удмурт фантастика» конкурс ортчыто.

Вожвылъяськон сӥземын Калыкъёслэн эшъяськон арзылы. Конкурсын 2 номинация: «Фантастика (фэнтези) жанрен гожтэм устоез удмурт верос» но «Фантастика (фэнтези) жанрен гожтэм веросэз удмурт кылэ устоез берыктэм уж». Та номинацие кутӥсько Россиысь калыкъёслэн кылъёсынызы гожтэм но удмурт кылэ берыктэм веросъёс. Произведениослэн быдӟалазы 13 сюрс знаклэсь ичи медаз луы.

Ужъёсты келяно 8-тӥ сентябрёзь. Дыр вань на, кузьымъёс устоесь. Соин ик эн азьтэмъяське, гожъяське! «Кенеш» журналлэн редакторез Анастасия Шумилова шуэ: —Удмурт литератураез пӧртэм жанръёсын узырмытэм потэ. Фантастика, уката ик фэнтези, туала лыдӟисьёсты бордазы кыске, тужгес ик егитъёс та жанрен тунсыкъясько. Россиысь куд-ог улосъёсын та ӧр зол азинске, шуом, Башкортостанысь, Уйпал Осетиысь журналъёслэн редакциоссы фантастикалы сӥзем вожвылъяськонъёс берло дыре радъялляло. Соослэсь бере кылем уг поты. «Удмурт фантастика» конкурсын котькуд номинациын быдэн 3 вормись быръемын луоз. «Фантастика жанрен гожтэм устоез удмурт верос» номинациын котькуд вормисьлы 30 сюрс манет тыр сертификат сётӥськоз.

Нош фантастикаез удмурт кылэ берыктэм понна котькуд вормисьлы 15 сюрс манет тыр сертификат.

Вормисьёс пӧлы пырымтэ авторъёс но ӟеч кузьымъёсын, дипломъёсын пусъемын луозы. Конкурсэ ыстэм устоосыз ужъёс печатламын луозы «Удмурт фантастика» бичетын.

Конкурс сярысь пыр-почгес тодыны луоз, «Кенеш» журналлэн «ВКонтакте» бамаз пырыса - «Кенеш» журнал.

"Удмурт дунне"