«Выль» выль сямен

2-тӥ гудырикошконэ Ижкарысь Космонавтъёслэн парказы выль емышъёслы сӥзем йӧскалыккуспо шулдыръяськон (0+) ортчоз.

Со удмурт, ӟуч, бигер, пор, мордва калыкъёсты огазеялоз. Со сярысь «Русский дом» центрлэн «ВКонтакте» мерлыко вотэсысь огиназ ивортӥзы.

Праздникез сӥё-дано усьтон 12 часын луоз. Соку ик йӧскалык азбаръёс ужаны кутскозы.

Шулдыръяськонэ лыктэмъёсты гурын пӧзьтэм ӝукен куноятозы. Мылкыд карисьёс мастер-классъёсы, йӧскалык шудонъёсы пыриськыны быгатозы.

Ужрадын чеберлыко киужъёсты, гурт возёсъёсын, сад-бакча возисьёсын будэтэм емышъёсты возьматыны но басьтыны луоз.

12 час 40 минутэ «Нас объединяет русская душа» йӧскалыккуспо концерт кутскоз.

15 часысен 16 часозь йӧскалык ӵошатсконъёс радъяськозы.

16 часысен Ижкарын улӥсьёсты но куноосты Пермьысь «Иваны» ансамбль шулдыртоз.

ИА «Удмуртия»