Удмурт кылэз дышетонъя курсъёслэн нырысетӥ паларез йылпумъяськиз

Удмурт Элькунын удмурт кылэз дышетонъя дунтэк курсъёслэн нырысетӥ паларез йылпумъяськиз.

Занятиос 9 площадкаын радъямын вал. Соос пӧлысь куинез Ижкарын - Кузебай Герд нимо удмурт кун йӧскалык гимназиын, Флор Васильев нимо но В.В. Маяковский нимо лыдӟиськонниосын, озьы ик быдэн одӥген площадкаос ужазы Глазкарын, Сарапулын, Ярын, Балезиноын, Шарканын но Юкаменскын. Удмурт кылэз дышетыны мылкыд карисьёсын ужазы 9 мыло-кыдо дышетӥсьёс: Дмитриева Наталья, Диева Адия, Кириллова Алёна, Никифорова Ольга, Толмачева Светлана , Наумова Валентина, Барышникова Ольга, Ефимова Елена, Ипатова Лариса.

Курсъёсы пыриськизы 188 адями (чакламлэсь 53 адямилы тросгес), пӧртэм арлыдъем, пӧртэм статусъем муртъёс, но валтӥсьёсыз - пенсионеръёс но школаын дышетскись пиналъёс. Дышетскисьёслэн шоро-куспо арлыдзы - 45 арес, тужгес егитэзлы — 4 арес, тужгес арлыдоезлы — 83 арес. Вуоноез пумиськонъёс кутскозы коньывуон толэзе. Чаклалэ иворъёсмес вотэс бамамы - Удмурт кылэз дышетонъя курсъёс.

Ӵектосэз анай кылъя дышетӥсьёслэн «Выжы» ассоциацизы «Удмурт Кенеш» огазеяськонэн ӵош Удмурт Элькунысь Йӧскалык политикая министерстволэн юрттэмезъя радъяло.

«Удмурт Кенеш»