104 арес тырмиз Эгра ёросысь фронт мышкын ужасьлы

Эгра ёросысь фронт мышкын ужасьлы Вера Константиновна Селиверстовалы 104 арес тырмиз.

Со сярысь Удмуртиысь мерлыко политикая но ужъя министерстволэн пресс-службаез ивортӥз. Вера Константиновна вордӥськиз 1922-тӥ арын Эгра ёросысь Верх-Палым гуртын. 7 аресысен колхозын ужаз: уриськиз, турнаськиз, турын утялтӥз. Быдӟым Атыкай ож дыръя со Ижкар аэродромез пуктонэ, озьы Ижкар – Балезино чугун сюресэз лэсьтонэ пыриськиз, отын сюреслэн тужгес но секыт люкетаз ужаз – Кекоран черкогуртын. Ож бере Вера Константиновна Эграысь бригадир, бухгалтер, улон-вылон кулэяськонъёсты быдэстонъя комбинатэн кивалтӥсь луыса ужаз.

Нылкышно Сэпысь Бырем гуртъёслэн музейлэн кутсконаз сылӥз. Солэн тодэ ваёнъёсыз но кырӟанъёсыз Удмуртилэн уйпалэзлэн калык лулчеберетэзъя архивын утисько. Солэн верамъёсызъя «Сепские былички» ӵектослы губи бичасьёс но Палэсмурт сярысь выжыкыл кылдытэмын.

Вера Константиновна керттӥськыны яратэ. Солэн выжлёгетъёсыз но пичи ковёръёсыз трос пол адӟытонъёсын поттамын вал.

ИА «Удмуртия»