Алнашын ӧсъёссэ нош ик усьтӥз Геннадий Красильниковлэн музей-юртэз

Алнашын ӧсъёссэ нош ик усьтӥз Геннадий Красильниковлэн музей-юртэз. Тупатъян ужъёс татын туэ тулыспалэ мытэмын вал.

Выльдэм музей-юртэз усьтонэ вуылӥз культурая министр Владимир Соловьёв. Солэн верамезъя, 1958-тӥ арын пуктэм юрт выльдэмез кемалась кулэ каре ни вал. — «Семья» нацпроект чотын бадӟым ремонт лэсьтэмын. Татын выльдӥзы укноосты но липетсэ, коркалэсь улӥ коръёссэ но корказьзэ воштӥзы, выль капка пуктӥзы. Тупатъян ужъёс 2 миллион манетлэсь тросгес усизы. Табере татын весь ваньмыз выль. Куинь ар талэсь азьло нацпроект пыр ик Алнашысь музейёслы выль ужан тӥрлык басьтыны уксё висъямы вал, таяз музее но со тӥрлыклэн оглюкетэз выжоз, — шуиз Владимир Михайлович.

Алнашысь Г. Красильниковлэн музееныз кивалтӥсь Ирина Васильева верамъя, музеез усьтон туж шуныт ортчиз. Г. Красильников вордӥськемын 7-тӥ июле, сӥё-дано ужрад ортчиз 8-тӥ пӧсьтолэзе.

— Со сяна, туэ музеймылы 35 ар тырме. Шумпотӥськомы, табере музейлэн вылтусыз гинэ ӧз, пушкыз но воштӥськиз. Удмурт классиклэн улэм коркаысьтыз бӧлетъёс, выж пулъёс воштэмын, выль обойёс лякемын. Музее калык ветлэ, тужгес но мӧйыос но пиналъёс. Ми туж трос ужрадъёс ортчытъяськомы. Писательлэн вордскем нуналаз урамлэсь праздниксэ но радъяськомы. Выльдэм музеез усьтонэ но трос адямиос ветлӥзы, писательлэн ӵыжы-выжыосыз но вуылӥзы, кылсярысь, двоюродной выныз Иван Михайлов, — шуиз Ирина Борисовна.

Туспуктэмъёс басьтэмын Культурая министерстволэн Вконтакте вотэсбамысьтыз

«Удмурт дунне»