Удмурт лулчеберетлы сӥзем нуналъёс - Соль-Илецк карын

Удмурт лулчеберетлы сӥзем нуналъёс ортчизы Оренбург улосвылысь Соль-Илецк карын.

Ужрад радъяськиз 26-тӥ инвожое Соль-Илецкысь Лулчеберет азинсконъя центрын. Удмурт Элькунысь делегация та нуналлы бадӟым программа дасяз. Вань мылкыд карисьёс понна Ижкарысь кибашлыослэн йӧскалык юртысьтызы ӧнерчиос куиськонъя но удмурт калык инструментъёсын шудонъя мастер-классъёс ортчытӥзы. Удмурт егитъёслэн "Шунды" огазеяськонзы пиналъёсын удмурт йӧскалык шудонъёсын шудӥз. Озьы ик нунал ӵоже кибашлыослэн ужъёсынызы адӟытон-вузкарон ярмарка ужаз.

Яркыт но пуштросо ужрад йылпумъяськиз концертэн. Люкаськемъёсты шулдыртӥзы Удмурт кун филармониысь калык кырӟанъя, крезьгуръя но эктонъя "Танок" кун ансамбльысь артистъёс.

Удмурт Элькунлэн Кун Кенешысьтыз лулчеберетъя, туризмъя но йӧскалык политикая ялан ужась ӧрилэн кивалтӥсез, Вань удмуртъёслэн "Удмурт Кенеш" огазеяськонлэн Тӧроез Андрей Ураськин пусйиз, таӵе ужрадъёс мукет улосъёсын улӥсьёсты удмурт калыклэн лулчеберетэныз, сям-йылолъёсыныз тодматыны но матысь кусыпъёсты радъяны юртто.

«Удмурт кенеш»