Сюмси ёросын «Узы-боры» фестиваль ортчиз

11-тӥ пӧсьтолэзе Сюмси ёросын гужемлэн тужгес емышо «Узы-боры» фестивалез ортчиз. Туэ ужрад сӥземын вал Россиысь калыкъёслэн огъя луэмзылэн арезлы но Сюмси черкогуртлы 200 ар тырмонлы.

Зор куазь но ӧз кышкаты! Фестиваль огазеяз Сюмси, Ува, Вавож, Дэри, Эгра, Шаркан, Пичи Пурга, Глаз ёросъёсысь, озьы ик Киров улосысь куноосты. Люкаськем калыкез ӟечкыласа вазиськизы Росси Кун Думаысь депутат Олег Гарин, Удмурт Элькунысь Кун Кенешлэн тӧроезлэн воштӥсьёсыз Татьяна Ишматова но Иван Черезов, Удмурт Элькунысь йӧскалык политикая министр Эдуард Петров, Удмурт Элькунысь егитъёсын ужан политикая министр Максим Файзулин, Сюмси ёрослэн тӧроез Павел Кудрявцев.

Та нуналэ пичиез но, бадӟымез но пӧртэм радъям вожвылъяськонъёсы пыриськыны быгатӥзы. Фестиваль улсын пӧртэм мастер-классъёс, кибашлыослэн ужъёсынызы адӟытон-вузкарон ярмарка ужаз. Удмурт эстрадаысь артистъёс яркыт концертэн шумпоттӥзы.

Узы-борылэсь ческыт пӧръёсты веръятэк но нокин ӧз кошкы. Тужгес паймымонэз - сюмсиос арысь аре кунооссэс бадӟым пыжем пироген пумитало. Туэ со 30 килограммъем пӧрмиз!

«Удмурт кенеш»