Удмуртиын йылпумъяськиз «П. И. Чайковскийлэн дор палъёсаз» 69-тӥез крезьгуро фестиваль

Туэ со уката но паськытгес ортчиз. 25-тӥ инвожоысен 5-тӥ пӧсьтолэзёзь шаерамы улӥсьёс 100-лэсь уно ужрадъёсты учкизы. Ижын сяна, концертъёс ортчизы Воткинскын, Сарапулын, Глазовын но Можгаын, тросэз соос дунтэк вал.
Кылсярысь, Иж тымет дорысь бадӟым сцена вылын, Удмуртиысь Операя но балетъя театр возьматӥз «Лебединое озеро» балетэз (12+), нош Удмурт театр — «Алые паруса» мюзиклэз (16+).
Шор площадьын туж трос площадкаос ужазы, быдэс семьяен шутэтскыны мед луоз шуыса. Операя но балетъя театр азьын пӧраськизы Удмуртиысь но мукет улосъёсысь тодмо шеф-поваръёс. Соос дасязы Пётр Чайковскийлэсь яратоно сиёнъёссэ.
Котькуд нунал ӝытъёсы Шор площадьын ортчылӥзы мастер-классъёс, эктонъёс, артистъёсын, диджейёсын, кавер-группаосын шулдыръяськонъёс.

2-5-тӥ пӧсьтолэзе «П. И. Чайковскийлэн дор палъёсаз» фестивале вуылӥзы тодмо артистъёс но коллективъёс: «Виртуозы Москвы» оркестр, Казахстанысь «Kazakh Quartet» квартет, органист Тимур Халиуллин, Россиысь но Абхазиысь калык артистка Хибла Герзмава, Москваысь Пётр Востоковлэн Бадӟым джазовой оркестрез но калык эктонъя Игорь Моисеев нимо кун ансамбль. Озьы ик одӥг сцена вылын ужазы 2 егит коллективъёс — Удмуртиысь егитъёслэн симфонической оркестрзы но Россиысь «Хор Первых» проектэ пыриськись музыкантъёс.
Россиысь калык артистка Хибла Герзмава концертэз азьын шуиз:
— Пётр Ильич Чайковский мынам улонам бадӟым инты басьтэ. Соин ик туж шумпотӥсько, дано крезьгурчилэн вордӥськем палъёсаз вуи шуыса. Ми Пётр Востоковен туж тунсыко программа вайимы, Пётр Ильичлы со кельшысал, дыр.