Россиысь туризм удысысь премиос понна Удмуртия но нюръяське

Россиысь туризм удысысь премиос понна вить номинациын нюръяське Удмуртия но. Ойдолэ асьме проектъёс понна дурбасьтом!

Куара сётон мынэ ини. Россиысь Рашн Тревелер Эвордс/Russian Traveler Award (Премия Русский Путешественник) премия сӥземын кунмылэн лунлыкъёсызлы. Куара сётыны быгатэ котькуд мылкыд карись: awards.rtraveler.ru/nominations/

Та ӵошатсконэ Удмуртия азьвыл но пыриськылӥз ини. 2024-тӥ арын удмурт пельняньмы вормиз вал «Национальное блюдо» номинациын, нош 2025-тӥ арын «Экскурсионный маршрут» номинациын кыкетӥ инты басьтӥз «Чайковский экспресс» ретропоезд (0+) маршрутмы. Туристъёс понна пӧртэм шутэтскон амалъёс радъясько «Туризм но куно пумитан» нацпроектъя, со улонэ пыӵа Россилэн Президентэз кичӧлтэмъя.

Туэ «Экскурсиосъя маршрут» номинациын вожвылъяське «Купеческий экспресс» (0+) ретропоезд. Удмуртиын со 2026-тӥ арын кылдӥз, соку ик калыклы яраз. Отчы билетъёс син куспын быро. «Купеческий экспресс» – со одӥг нуналлы чаклам маршрут, Ижысен Сарапулозь. Вань программа вашкала вакытэ кадь лэсьтэмын.

Пельнянь фестивальмы (0+) «Фестиваль/праздник» номинациын вожвылъяське. Шаерамы та фестиваль толшор шутэтскон нуналъёсы арлы быдэ ортче. Туэ отчы быдэс Россиысь 8 сюрслэсь трос адями пыриськиз, Арктикаысен кутскыса, Камчатка дорозь улосъёсысь пӧраськисьёс вуылӥзы.

Нош калык сиёнъёслы сӥзем номинациын вожвылъяськоз перепеч, Москваысь ВДНХ-ын туэ та тужгес яратоно сиён луиз ни. «Природный объект России» номинациын куара сётонэ пыриське Мыргетон гурезьмы. Таиз Юкаменск ёросысь «Тылыс» туркомплексын. Бесермян кылысь берыктыса, мыргетон — ошлэн бӧксэмез. Мыргетон гурезь вылысь, пе, синву кадь чылкыт 30 ошмесъёс васько. «Промтуризм» номинациын вожвылъяське Сарапулысь электрогенераторной заводлэн музей-адӟытонэз. Быдэс Россиысь промышленной предприятиосты учконо ке, та заводын гинэ огдыре ик кык музей ужа.

— Премилы дэмлам интыосмы, маршуртъёсмы магнитъёс сямен Удмуртиямы кыскыны кулэ. Татын ик гастрономия, промышленной туризм, экотуризм но фестивальёс, пайдаё шутэтскыны луонлыкъёс, – пусйиз туризмъя министир Юлия Бадаш.