Удмуртиын семьяосты «За любовь и верность» медален пусйизы

Семьялэн, яратонлэн но ог-огдэ гажанлэн нуналзылы сӥзьыса, адӟем карымон семьяосты «За любовь и верность» медален пусйизы.

Ижысь дун-чылкыт Михаиллэн соборез дорысь Пётр но Феврония Муромскийёслы сӥзем синпелет дорын данъяло 25 арлэсь кема ӵош улӥсь, 2 но солэсь трос нылпи будэтӥсь семьяосты «За любовь и верность» медален. Та нуналэ шаерысьтымы ёросъёсын но городъёсын 70 кузпалъёсты сӥлы каризы. Адӟем карымон семьяосты Ижын ӟечкылазы Тӧролэн но Правительстволэн администрациенызы кивалтӥсь Александр Журавлев но Ижысь но Удмуртиысь митрополит Викторин.

Якшур-Бӧдьяысь Вера но Андрей Вахрушевъёс 28-тӥ арзэ ӵош уло, нош тодматскиллям ӵыжы-выжызылэн сюаназ. 4 пинал вордӥзы, внуксы будэ. Пичи нылпиоссы бордазы уло на. Вера Петровна ачиз но бадӟым семьяын быдэ вуэмын: 4 нылъёс но пи вылӥллям. Ог-огзэс яратыса, ог-огзылы юрттӥськыса будэмзы али но юн шӧдӥське: вань ӵыжы-выжыосынызы люкаськыса — вемеен — арлы быдэ сямен ог-огзылы коркаос пукто. — Яратэ ог-огдэс, дунъялэ анай-атайдэс, — шуиз Вера Вахрушева, ужрадэ вуэм егитъёслы, нылпиослы вазиськыса. — Быдэ вуыса вордскем палъёстылэсь палэнэ кошкиды ке но, котьку тодады возе дордэс но мумы-бубыостэс, яратэ вордскем шаердэс! Вань кузпалъёс инме тӧдьы дыдыкъёсты лэзизы, ӵошен 50, 60 но солэсь тросгес ар ог-огзэс валаса, яратыса но тупаса улыны мед кылдоз шуыса.