Кореяысь тужгес кужмо университетъёсын дышетскись студентъёс вуылӥзы Удмурт кун университетэ

Удмурт университетын йылпумъяськиз ӟуч кыллы но литературалы сӥзем «Лето в России - 2026» школа. Со радъяськиз «Русский мир» фондлэн грантэзъя. Проектэ пыриськизы Кореяысь тужгес кужмо университетын дышетскись 20 студентъёс. Удмуртиысь Правительстволэн Тӧроезлэн воштӥсез Татьяна Чуракова пусйиз: - Кореяысь студентъёслэн потэ ӟуч кылэз дышетэмзы, соин ик «Лето в России - 2026» проект кылдӥз. Со улонэ пыӵаз «Молодёжь и дети» нацпроектъя. Таӵе пумиськонъёс асьме университетъёсмылы но выль инвисъёс усьто.

УдГУ-лэн ректорезлэсь ужзэ быдэсъясь Анна Овчинникова тодэ вайытӥз: - 1990-тӥ аръёсысен ини университетмы пӧртэм кунъёсын кусыпъёс тупатъя. Камён университетэн огкыл гожтэмын вал ай 1994-тӥ арын. Нош али ми эшшо вылӥгес тубатэ ӝутским - дорамы Кореяысь элитной университетъёсысь огдыре ик 20 студент вуиз. Котькудӥз соос асьме дорысь бертыны кулэ асьме культурамес гажаса, тодыса, азьланезлы ӟеч кусыпъёс тупатыса.

Кӧня ке нунал ӵоже Коряеяысь студентъёс вуылӥзы Удмуртилэн пӧртэм сэрегъёсаз, тодматскизы интыысь культураен, устолыкен. Вуылӥзы Эшъяськон юртэ, цирке, ветлӥзы Сарапулэ, паймизы Чайковскийлы сӥзем фестивальлэн ортчемезлы, Иж тымет дурын учкизы «Иоланта» операез, Воткинскын пыриськизы дворян культуралы сӥзем «Мелодии лета» фестивале...

- Гужем школае вуылон - кылэз волятыны туж ӟеч луонлык, со сяна, интыысь ӟуч, удмурт культураен мургес тодматскон. Та тодон-валанъёсы юрттозы мыным общественной дипломатия ужея, - шуиз кунсьӧр кылъёсъя Ханук университетын 3-тӥ курсын дышетскись Ли Юна.