21-тӥ апрельысен 12-тӥ июнёзь Россиын улӥсьёс бырйизы вуоно арын выльдоно объектъёсты

Быръем интыос шулдырскозы Президентлэн кичӧлтэмезъя пыӵась «Инфраструктура для жизни» нацпроект улсын быдэсъяськись «Формирование комфортной городской среды» (ФКГС) программая. Удмуртиын куара сётонэ азьвыл аръёсынлэсь тросгес калык пыриськиз — 127 сюрс 169 адями. Ӵектэмын вал 8 муниципал кылдытэтъёсысь 30 объектъёс.

Куара сётон тужгес но шаплы мынӥз Ижын. 15 сюрс 894 адями дурбасьтӥз Холмогоров урамысь сиклы. Сарапулын 10 сюрс 86 куара люкаськиз А. Пушкин нимо сад понна (лэсьтӥськонлэн 3-тӥ люкетэз). Можгаын 7 сюрс 386 улӥсьёс бырйизы Можгинская урамысь Вормон скверез — отысь аллея котырез шулдыртоно но мугорез кыдатон площадка пуктоно. Воткинскысь 6 сюрс 601 адями бырйиз Юбилейной урамысь скверез. Эгра каргуртысь 6 сюрс 384 мурт дурбасьтӥз «Эгра» этно-парклы. Уваын 5 сюрс 364 куара люкаськиз К. Маркс урамысь Центральной проспект понна. Сое выльдыны кутскизы вал 2 ар талэсь азьло — табере ужъёс азинтӥськозы вуоно арын но. Пичи Пурга черкогуртын вуоно арын выльдӥськоз тыметсылэн котырыз — сое бырйиз 5 сюрс 180 адями. Глазовын Драгунов урамлы дурбасьтӥз 4 сюрс 281 адями — отын мугорез кыдатонъя площадка пуктэмын луоз.

Суред: Тӧролэн но Правительстволэн сайтысьтызы.