2011-тӥ арысен шаерамы радъяське «Зелёный марш» программа

Отчы пырисько нылпи садъёсысь, школаосысь пиналъёс. Ар куспын соос понна ортчыло пӧртэм ужрадъёс: радъясько инкуазез утёнлы но отходъёслэсь выль арбериосты поттонлы сӥзем урокъёс, пиналъёс пырисько субботникъёсы, чакласа возё котыр инкуазьлэсь воштӥськемзэ, дышетско мулэсь но вулэсь ӟечлыксэ эскерыны.

— Туэ программае пыриськизы пӧртэм школаосысь 47 командаос, — шуиз инкуазез утёнъя но инкуазь узырлыкъёсъя министрлэсь ужзэ быдэсъясь Роза Аснанова. — Соос макулатура бичазы, 50 субботникъёс ортчытӥзы, 24 тыметъёслэн но 12 шуръёслэн ярдуръёсысьтызы жуг-жагез утялтӥзы. Инкуазез яратыны но утьыны пичиысен ик дышетоно.

Туэ программаын вормисе потӥзы Шаркан ёросысь Пороз школаысь пиналъёс. Нылпи садъёс пӧлын устоен лыдъямын Можга городысь 4 номеро нылпи сад.

Туспуктэмъёс: Тӧролэн но Правительстволэн пресс-службаез.