19-тӥ инвожое «Удмурт дунне» газетысь журналистъёс Пичи Пурга ёросысь Улын Юри гуртэ вуылӥзы. Отын «Чигымтэ чидан» книгаен тодматскон ортчиз

Пумиськонъёс дыръя книга бордын ужамзы сярысь веразы «Удмурт дунне» газетлэн валтӥсь редакторез Елена Миннигараева, журналист Элина Кумачёва. Книгае пырем 59 очеркъёс пӧлысь 8-эз — Пичи Пурга ёросысь. Люкаськемъёс синвуаськыса кылзӥзы книгаысь историосты: мае но ӧз чидалэ Быдӟым ож дыръя кышномуртъёс, нылпиос, песянайёс...

Журналистмы Татьяна Соловьёва вакчияк тодматӥз Пичи Пурга ёросысь спецоперациын быремъёслэн улон но ожмаськон сюресэнызы, вераз али пыриськисьёс но гуманитарной юрттэт сётӥсьёс сярысь.

Ужрадэз туж шуныт нуиз Улын Юри библиотекалэн кивалтӥсез Екатерина Донцова. Кырӟанъёссэс быдэстӥз гуртысь коллектив. Туж шумпотымон, люкаськемъёс пӧлысь тросэз «Удмурт дунне» газетэз лыдӟо, котькуд номерез, пе, чидатэк витё.