Валче уломе!

Таӵе кылъёсын пумитаз удмуртъёсты Глаз ёрос. Татын паськыт ортчиз улосвылкуспо "Гербер" шулдыръяськон. Со быдэс Удмурт Элькунысь, озьы ик Татарстанысь, Башкортостанысь, Киров улосвылысь, Пермь шаерысь, Марий Элысь, Москваысь но Санкт-Петербургысь куноосты пумитаз.

Туэ праздник батыръёслы сӥземын вал, вакытъёс вискын со улэп выжлы пӧрмиз. Валтӥсь сцена вылын нырысьсэ чузъяськиз Михаил Атамановлэн "Тангыра" эпосэзъя оратория.

Гербер праздникен люкаськем калыкез ӟечкылазы Удмурт Элькунлэн Тӧроез Александр Бречалов, Росси Кун Думаысь депутатъёс - Андрей Исаев, Олег Гарин, Лариса Буранова, Удмурт Элькунысь Кун Кенешлэн Тӧроезлэн воштӥсез Татьяна Ишматова, Удмурт Элькунысь йӧскалык политикая министр Эдуард Петров, Удмурт Элькунысь Кун Кенешлэн ялан ужась ӧриезлэн кивалтӥсез, Вань удмуртъёслэн "Удмурт Кенеш" огазеяськонзылэн Тӧроез Андрей Ураськин.

Андрей Иванович удмурт калыклэсь кылзэ, лулчеберетсэ, сям-йылолъёссэ утёнын но азинтонын бадӟым уж нуэмзы понна "Удмурт Кенеш" огазеськонлэн таукаронэныз пусйиз Удмуртиысь лулчеберет удысысь дано ужасез, калык художникез, Ува ёросысь Узей-Тукля гуртысь Кибашлыослэн юртэнызы кивалтӥсез Геннадий Сидоровез но Глаз ёрос лыдӟетъюртысь шаертодон ужез радъянъя валтӥсь библиотекарез Зинаида Перминоваез.

Кизёнэз умоен быдтэмлы шумпотыса, гырись-кизисьёслы, нянь будэтӥсьёслы, Инмарлы тау карыса, вӧсям ӝук сиим, кырӟам-эктӥм. Зор куазь но ӧз кышкаты, огазеяз гинэ!

Глаз ёрослы тау каром, вуоно арын пумиськом Сюмсиын!