Яркытэсь йӧскалык дэремъёс, жингрес калык кырӟанъёс, чалмисьтэм арган куараос, задоресь тыпыртонъёс - удалтӥз Ижкар Гербер!

Удмуртъёслэн одӥгез яратоно шулдыръяськонзы туэ Космонавтъёслэн парказы ортчиз.

Вань люкаськемъёсты ӟечкылазы Росси Кун думаысь депутат Олег Гарин, Удмурт Элькунлэн Кун Кенешысьтыз лулчеберетъя, туризмъя но йӧскалык политикая ялан ужась ӧрилэн кивалтӥсез, "Удмурт Кенеш" огазеяськонлэн тӧроез Андрей Ураськин, Ижкар Думалэн тӧроез Любовь Зайцева, Ижкар Администрацилэн тӧроезлэн воштӥсез Наталья Гвоздкова, Удмурт Элькунлэн Кун Кенешысьтыз депутат Андрей Фефилов, Калыкъёслэн Эшъяськон юртсылэн кивалтӥсез, Удмурт Элькунысь Мер палаталэн тӧроез Юлия Шахтина.

Котькудӥз туннэ аслаз сюлмызъя уж шедьтӥз. Пичи сцена вылын Ижкарысь фольклор коллективъёслэн, "Шунды" огазяськонысь егитъёслэн но кырӟанъя "Сюрприз" студие ветлӥсь пиналъёслэн концертсы ортчиз. Валтӥсь сцена вылын элькунысьтымы артистъёс но коллективъёс учкисьёслы задор мылкыд кузьмазы. Калыкез шулдыртӥзы удмурт эстрадая "Шулдыр ӝыт" ансамбль, калык кырӟанъя но эктонъя "Зангари" ансамбль, "Италмас" ансамбль бордын ужась нылпи студия, фольклор кырӟанъя но эктонъя "Айкай" кун театр.

Ӧз ортчы шулдыръяськон интерактивной программатэк но. Кузебай Герд гимназия, Калыкъёслэн Эшъяськон юртсы, "Кизили" журнал, Флор Васильев нимо библиотека, лулчеберетъя "Спартак" юрт пичос понна трос пӧртэм мастер-классъёс радъязы. Бадӟымъёс ӵужонболын кужымзэс мерттазы. Мукет площадкаосын вань мылкыд карисьёс удмурт шудонъёсын шудӥзы.

Быдэс нунал ӵоже кибашлыослэн ужъёсынызы адӟытон-вузкарон ярмарка ужаз. Котькудӥз быгатӥз аслыз синпелет басьтыны. Тунсыкоесь туспуктэмъёс но лэсьтыны луэ вал, со понна юри дасямын вал чебер фотозонаос.

Кизем юос мед ӝужалозы, малпам ужъёс мед пӧрмозы, азьланяз но тазьы валче, огазе люкаськыса мед улом!

Туспуктэмьёсыз Наталья Михайловалэн.