Россиысь дано, Удмуртиысь калык художниклы Пётр Ёлкинлы 80 арес тырмиз

Пётр Васильевич суредан искусстволэн пӧртэм жанръёсаз ужа. Солэн усто пӧрмо портретъёсыз, графика амалэн быдэстэм ужъёсыз, инкуазь суредъёсыз, натюрмортъёсыз. Пётр Ёлкин трос тодмо удмурт адямиослэсь портретъёссэс кылдытӥз, пӧлазы – тодосчиос, крезьгурчиос, эмчиос, писательёс, артистъёс. Солэсь гожтэм портретъёссэ учкиськод но валаськод: котькуд героезлэн — аслаз сямыз. Пётр Васильевичлэн быдэс творчествоез пыӵамын адямиез но инкуазез яратонэн. Одӥгаз интервьюаз Пётр Ёлкин шуиз: — Азьло но, али но шуисько: мон туж шудо адями. Суредъёсме учкыса, тросэз верало, ужъёсы югытэсь, сайкытэсь шуыса. Мон адямиосты яратӥсько, со бордын, дыр, мугез. Инкуазез-а, адямиез-а дэра вылэ пуктӥськод, аслэсьтыд лул-сюлэмдэ усьтӥськод, кузьмаськод. Тужгес но шумпотӥсько адямиез гажаса суреданы быгатэмелы.

Гажано Пётр Васильевич, ми ӟечкыласькомы тӥледыз юбилееныды! Таза луэ, котькуд нуналлы шумпотыса улэ!

Туспуктэм: "Удмурт дунне" газетлэн архивысьтыз