Тол Бабай кузьмаське гужем но

Шаерамы мытэмын «Ёлка желаний» акция. Удмуртиын сяна, нокытын но со гужем уг радъяськы. Та вал Тӧролэн Александр Бречаловлэн кичӧлтонэз. Акция туэ гужем ортче ни 4-тӥзэ.

«Ёлка желаний» акция улсын кивалтӥсьёс, депутатъёс, ужбергатӥсьёс, ӟеч уж лэсьтыны вань мылкыд карисьёс кузьымъёсын шумпотто секыт югдуре шедем, ёрмись семьяосысь, сирота кылем нылпиосты, СВО-ысь ожгарчиослэсь пиналъёссэс. Озьы ик акция улсын быдэсмо Луганск Республикаысь Лутугино городын но ёросын улӥсь нылпиослэн куронъёссы. «Единая Россия» партия сюлмаськемъя но «Движение Первых» огазеяськон юрттэмъя, «Ёлка желаний» акция туэ гужем шаерамы ортчоз вань городъёсын но ёросъёсын.

Пиналъёслэн куронъёсынызы гожтэтъёс бырттэмын кызъёслэн вайёссы борды. Нылпиосты утён нуналэ, 1-тӥ июне, Удмуртилэн Тӧроез, «Единая Россия» партилэн Удмурт ёзэзлэн секретарез Александр Бречалов 3 открыткаез ишкалтӥз. Нырысетӥез вуэмын Дэри ёросысь Катя нимо нылашлэсь. Солы кельше журналистика: школазэ йылпумъяса, теле- яке радиоведущий, пе, луысал. Нылашлэн шаерысьтымы кудаз ке телерадиокомпание вуылэмез потэ. Тӧро нылашлы вазиськиз: Катюша, малпандэ одно быдэстом. Кыкетӥез открытка вуэмын Яр ёросысь Артём, Ксюша но Илья пиналъёслэсь Соос туж ярато валъёсты — утялтыны но, ворттылыны но. Учкеммы, пе, потэ вал вылын ворттылонъя ӵошатсконъёсты. Александр Бречалов оскытӥз: ӵошатсконэ одно вуылоды. Куинетӥез открытка вуэмын Луганск Республикаысь Миша нимо пияшлэсь. Солэн но малпанэз быдэсмоз — Тӧролэсь солы велосипед келямын луоз.

Туспуктэм: Татьяна Ишматовалэн "ВКонтакте" бамысьтыз. Нылпиослэсь куронъёссэс быдэсто кун ёзъёсысь кивалтӥсьёс, депутатъёс, ужбергатӥсьёс.