Удмурт писательёс, ӧтиськомы пыриськыны «УДМУРТ ФАНТАСТИКА» ВОЖВЫЛЪЯСЬКОНЭ!

Россиысь калыкъёслэн огазе луонзылы сӥзем аре Йӧскалык прессалэн юртэз но «Кенеш» журналлэн редакциез Удмурт Элькунлэн Кивалтэтэзлэн но Йӧскалык политикая министерстволэн юрттэменызы ортчыто «Удмурт фантастика» вожвылъяськон.

Конкурс кык номинацияя ортче:

1. Фантастика (фэнтези) жанрен гожтэм устоез удмурт верос. Та номинацие кутӥсько удмурт кылын гожтэм веросъёс (быдӟалаез — ӧжытсэ 13 сюрс знак).

2. Фантастика (фэнтези) жанрен гожтэм веросэз удмурт кылэ устоез берыктэм уж. Та номинацие кутӥсько Россиысь калыкъёслэн кылъёсыныз гожтэм но удмурт кылэ берыктэм веросъёс (быдӟалаез — ӧжытсэ 13 сюрс знак).

Ужъёсты келяны луоз 8-тӥ сентябрёзь (2026-тӥ ар).

Котькуд номинациын быдэн 3 вормись быръемын луоз. Вормисьёсты таӵе кузьымъёс витё: «Фантастика (фэнтези) жанрен гожтэм устоез удмурт верос» номинациын — котькуд вормисьлы 30 сюрс манет тыр сертификат. «Фантастика (фэнтези) жанрен гожтэм веросэз удмурт кылэ устоез берыктэм уж» номинациын — котькуд вормисьлы 15 сюрс манет тыр сертификат.

Вормисьёс пӧлы пырымтэ авторъёс но ӟеч кузьымъёсын, дипломъёсын пусъемын луозы. Конкурсэ ыстэм устоосыз ужъёс печатламын луозы «Удмурт фантастика» бичетын.

Удмурт писательёс, ойдолэ ӵошен удмурт фантастика жанрез азинтомы! Пыриське вожвылъяськонэ!

‼ Конкурслэн ортчемез сярысь гожтэмын Положениын, соин одно ик тодматскыны дэмласьком (та пост борды юнматэмын). Юанъёсын вазиськоно, «Кенеш» журналлэн «ВКонтакте» бамаз сообщение гожтыса, электрон почта пыр вазиськыса яке 89512014771 номеръя жингыртыса.

Конкурслэсь логотипсэ дасяз Вера Штыкова.