Удмуртиысь 6 семьяос вормисе потӥзы «Семья года» конкурслэн улос люкетаз

Конкурсэ пыриськыны мылкыд каризы шаерысьтымы 70 семьяос. Соослы семьязы сярысь видеовизитка дасяно вал. Соос пӧлысь устооссэ — 6 семьяез — бырйиз Калыкез улон-вылонын утён политикая но ужъя министерстволэн нимысьтыз комиссиез.

«Трос нылпиё семья» номинациын устоен лыдъямын Воткинск ёросысь Актыбаевъёс. Алексей но Дарья кузпалъяськизы 10 ар талэсь азьло, будэто 8 пиналъёссэс. Бадӟымезлы 8 арес, пичиезлы — 8 толэзь. Ми пиналъёсмес ог-огзылы юрттыны дышетыса будэтӥськомы, шуо кузпалъёс.

«Гуртысь семья» номинациын вормизы Грак ёросысь Лыбковъёс. Егор но Наталья будэто 3 нылпиоссэс. Бадӟым хозяйствозы — Благодатное гуртысь тыметын карплэсь малёкъёссэс будэто, ӟазег вордон фермазы но вань. Пиналъёссы — зэмос юрттӥсьёссы.

«Отечествоез утисьлэн семьяез» номианциын устоен лыдъямын Сарапул ёросысь Макшаковъёс. Алексей но Галина ӵошенназы 20 ар, 5 пиналъёссы. Алексей 2024-тӥ арын СВО-е кошкиз. Кышкасьтэм луэмез понна пусъемын «За боевые отличия» медален. Кылем арын Макшаков кузпалъёс сӥлы каремын вал «Родительская слава» пусэн.

«Егит семья» номинациын вормисе потӥзы Яр ёросысь Ивановъёс. Соос будэто 2 пиналзэс. Быдэс семьяенызы черкысь богослужениосы ветло. Тужгес но кельше соослы Ымусьтонэз но Быдӟымнуналэз пусйыны. Кузпалъёс нылпиоссэс сям-йылолъёсты гажаны дышето.

«Зарни семья» номинациын устоен лыдъямын Каракулино ёросысь Лобановъёс. Кузпалъёс 50 ар ӵош уло ни. Выжыязы нимо-дано адямиоссы лачак — кузпалъёс соос сярысь 280 бамъем «Память» бичетсэс но поттӥзы.

«Сям-йылолъёсты утись семья» номинациын вормизы Воткинск ёросысь Вахрушевъёс. Кузпалъёс пиналъёссэс удмуртлыкез гажаны дышето: удмурт кыллы дышето, дэмен удмурт сиёнъёс пӧрало, удмурт сямен кырӟало-верало.

Шаерамы вормисе потэмъёс пыриськозы конкурслэн финалаз. Кунмыя вормисе потэмъёслэн нимъёссы тодмо луозы июле. Соосты сӥлы карозы Октябре Москваын.

Туспуктэм: Тӧролэн но Правительстволэн пресс-службаез.