"Семья йылолъёсъя "Кӧкы" этнофорум" ӵектосмы улсын азьланьтӥське "Семья сям-йылолъёс" нимо этномастерскойёслэн ужзы

Соос пӧртэм амалэн ортчо, вуныны кутскем удмурт йылолъёсты улӟытыны, соосты улонэ пыӵатыны, выль тодон-валан сётыны юртто.

Кылсярысь, Игра ёросын "Табань-клуб" ортчиз. Бадӟым Пурга палан улӥсьёс ӵӧжиен табань сиизы. Ужрадэ трос пиналъёс люкаськизы. Мумы-бубыоссы но песянайёссы тупен-тупен возьматӥзы, кызьы соос дорын ортче та йылол.

Нош Глаз ёросын семьяослы этноквест радъяськиз, со уйпал удмуртъёслэн сям-йылолъёссылы сӥземын вал. Люкаськем калыкез туж шулдыр пумитаз фольклоръя "Пестросаес" ансамбль. Пӧжы гуртысь "Истоки" шаертодонъя ёзлэн кивалтӥсез Ольга Городилова пыр-поч мадиз "Армие келян", "Сюан", "Пинал пыртон", "Вожодыр", "Турнаны потон" йылолъёс сярысь. Тросэз анай-атайёс тодазы вайизы, кызьы соос пичи дыръя ортчыло вал семьяязы та сям-йылолъёс. Оскытӥзы, тодон-валанзэс пиналъёссылы но одно ик пыӵатозы шуыса.

Ӵектос радъяське Удмурт Элькунысь экономикая министерстволэн но Россиысь Азьмуртлэн фондэз юрттэмзыя.