Котырес лыдпуссэ пусйиз Россиысь дышетон удысысь дано ужась Вера Григорьевна Пантелеева

Вера Пантелеева — 3 монографиослэн, 200-лэсь уно наукая статьяослэн, «Триптих», «Интыысь дыр» но мукет книгаослэн авторзы.

Россиысь «Языковая арт-резиденция. Музыка слова» проектлэн кивалтӥсез Анжелика Лукина шуэ:

— Кыкетӥ арзэ ми Россиысь калыкъёслэн кылъёсынызы гожъяськись егит писательёсын ужаськомы. Та дыр ӵоже милемын артэ Вера Пантелеева. Солэн тыршеменыз анай кылынызы гожъяськисьёс бордамы тросгес кыстӥсько, асьсэос ик берыктон ужен вырыны кутско, угось валало: берыктӥсьёслы луыса кылъёс но литератураос утисько-азинско. Вера Григорьевна котькуд чеберлыко текстлэсь дунлыксэ возьматыны быгатэ — оригиналлэсь но, берыктэмезлэсь но. Валан сётэ, берыктӥсь котьку но лёгамтэ сюрестӥ вамышъя шуыса, малы ке шуоно котькуд произведенилэн аслаз аспӧртэмлыкез.
Берыктон — секыт удыс, тае примеръёс вылын валэктэмез понна, Вера Григорьевналы тау шуиськомы! Проектъёсмылэсь аспӧртэмлыко калейдоскоп лэсьтыны луысал ке, отын егит писательёсынымы ӵош дунъясьёсмы но луысалзы, нырысь радын — Вера Григорьевна.

Вордӥськем нуналэзлы Вера Григорьевна аслыз но, лыдӟисьёсызлы но усто кузьым лэсьтӥз — «Наизусть. 60 историй от барышни-крестьянки» книгазэ (12+) поттӥз. Татчы пыризы ӟуч но удмурт кылын гожтэм эссеосыз, улонысь учыръёсыз но веросъёсыз. «Наизусть...» книгаеныз тодматскон ортчоз 25-тӥ куартолэзе Дэри черкогуртын.

🌸Вера Григорьевна, ми сюлмысь ӟечкыласькомы тӥледыз юбилееныды. Шудбур, тазалык, выль тунсыко ужъёс, пумиськонъёс но вормонъёс!!!