Алнаш ёрос библиотекаын ортчиз Лариса Мардановалэн «Игры бабочек» выль книгаеныз тодматскон.

Лариса Марданова - удмурт но ӟуч кылын гожъяськись писатель, кылбурчи, Россиысь писательёслэн огазеяськонзылэн ёзчиез.

Вордӥськемын Алнаш ёросысь Вылӥ Асангуртын 1976-тӥ арын. Дышетскиз Удмурт кун университетысь удмурт филологияя факультетын. Пӧртэм аръёсы ужаз Алнашысь кибашлы нылпиослэн юртазы, университетысь ӟуч филологияя кафедраын, Удмуртиысь Писательёслэн огазеяськоназы, дышетскиз аспирантураын.

2003–тӥ арын Лариса Николаевна Москваысь М. Горький нимо Литературной институтын Вылӥ курсъёсын тодон-валан люказ. «Столичная энциклопедия» издательской юртын редактор, собере валтӥсь редактор луыса ужаз. Нош 2010-тӥ арын Москваысь экономикая но предпринимательствоя институтэз йылпумъяз на.

Туэ толшоре Лариса Николаевна 50 аресъем юбилейзэ пусйиз. «Игры бабочек» - писательлэн ньылетӥ книгаез. Лыдӟисьёс понна со зэмос кузьым луиз. Алнашысь библиотекае вуылӥзы Лариса Мардановалэн тодмоосыз, ӵыжы-выжыосыз, ӵош дышетскем эшъёсыз но литератураен тунсыкъяськисьёс. Презентациын анаез Валентина Васильевна тодаз вайиз нылызлэсь будэмзэ, творчество котыре кыстӥськемзэ. Эшъёсыз мадизы студент вакытъёссэ.

Малы книга «Игры бабочек» нимаське? Автор пусйиз: туж кема малпаськиз, бумагалась ньыль бамзэ гожъяса потӥз но та нимез бырйиз. Угось удмурт сям-йылолъёсты учконо ке, бубыли, пе, воштӥськонлэн пусэз луэ, со Инмарлэсь ивор вуттэ кадь. Книгае 12 верос но 24 кылбур пыремын. Авторлэн верамезъя, ваньзы соос ог-огенызы герӟаськемын, одӥг жильые биниськемын.

Пумиськон туж шуныт пӧрмиз. Пыр-почгес лыдӟыны луоз «Удмурт дунне» газетысь.

Туспуктэмъёс понна тау Алнашысь библиотекалы Алнашская районная библиотека.