Ижын ортче бадӟым ӵошатскон — школьникъёс куспын баскетболэн шудонъя «КЭС-БАСКЕТ» лигалэн чемпионатэзлэн суперфиналэз (0+)

Та нуналъёсы Ижын ортче бадӟым ӵошатскон — школьникъёс куспын баскетболэн шудонъя «КЭС-БАСКЕТ» лигалэн чемпионатэзлэн суперфиналэз (0+)

Тӧро Александр Бречалов сюлмаськемъя, та бадӟым ӵошатскон Ижын радъяськылӥз вал ни 2023-тӥ арын. Сое туэ но шоркарамы ортчытон сярысь Александр Бречалов огкылэ вуиз «КЭС-БАСКЕТ» лигалэн президентэныз Алексей Фроловен. Озьы 18-тӥ апреле Удмуртие вуизы Россилэн пӧртэм сэрегъёсысьтыз баскетболэн шудӥсь школьникъёслэн 40 командаоссы. Пӧлазы Удмурт шаерысь но — Глазовысь 8 номеро гимназиысь нылашъёслэн но Сарапулысь 17 номеро школаысь пияшъёслэн командаоссы.

25-тӥ апрелёзь пӧртэм командаос куспын бӧрсьысь бӧрсе ӵошатсконъёс ортчозы. Нырысетӥ матчъёсты учкыны но асьме командаос понна висьыны Ижысь «БаскетДом» комплексэ вуылӥз Тӧро Александр Бречалов. Баскетболистъёслы со вормонъёс сӥзиз. Глазовысь нылашъёс кужымзэс мертазы ни Санк-Петербургысь, Астрахань улосысь но Алания Республикаысь командаосын. Туж яркыт ортчиз Санкт-Петербургысь баскетболисткаосын шудон. Солэн нырысетӥ люкетаз асьме нылашъёс кульчое тупсэс вылысьтыз вылаз куязы, трос очко люказы. Санкт-Петербургысь команда шудонлэн пумаз вань кужымзэ поттыны тыршиз на ке но, асьмелэнъёслы 60:52 счётэн келяз.

Сарапулысь пиос шудӥзы ни Самара улосысь командаен. Туж зол бызьылӥзы ке но, соослы вормыны ӧз кылды: шудон йылпумъяськиз 72:82 счётэн. Азьланяз асьсэды возьматыны быгатозы на — шудозы мукет командаосын.

Чемпионатлэн суперфиналаз, баскетболэн шудон сяна, ортчозы уно ужрадъёс. Кылсярысь, 22-тӥ апрельысен 24-тӥ апрелёзь шаермылэн пӧртэм интыосаз луозы нимо-дано баскетболистъёсын, олимпийской чемпионъёсын но соослэн тренеръёсынызы пумиськонъёс. Кылсярысь, Наталья Водопьяноваен, Алексей Саврасенкоен, Сергей Моняен, Светлана Антиповаен. Баскетбол сярысь соосын кенешыны быгатозы шаерысьтымы 200-лэсь ятыр школьникъёс. Суперфиналлэн берпуметӥ нуналаз — 25-тӥ апреле — шараямын но данъямын луозы вормисе потэм командаос.

21-тӥ апрельлы Глазовцысь баскетболисткаослэн командазы ӵошатсконлэн финалаз потӥз. 25-тӥ апрелёзь вормон понна нюръяськозы.

Туспуктэмъёс: vk.com/kesbasket