Удмурт калыкез творчествоенызы бурдъясь, ӟеч ужъёсынызы сьӧразы валтӥсь адӟымон нылкышноосты арлы быдэ Ашальчи Оки нимо йӧскалык премиен пусъё

Туннэ удмурт нылкышно кылбурчилэн но Быдӟым ож пыр потэм эмчилэн Ашальчи Окилэн вордӥськем нуналыз. Солы сӥзьыса, Удмурт кун университетын бадӟым ужрад ортчиз. Ӵапак отын ик сӥлы каризы премиен пусъем муртэ. Та премиен туэ пусъемын Элькунысьтымы культурая колледжын ужась преподаватель, Удмуртиысь культура удысысь дано ужась, Россиысь шор профессиослы дышетон удысысь дано ужась Надежда Полякова.

Надежда Семёновна тау кариз ӵош ужась эшъёсызлы, выпускникъёсызлы, али дышетскисьёслы. Нуналлы быдэ выль тодон-валан сётэме потэ, соослэсь емышсэс басьтӥськод ке, эшшо но ужам потэ, шуэ. Пиналъёсын ужаса, пе, эшшо егитомоно. Та ужрадэ но со огназ лыктымтэ — 3-тӥ курсын дышетскисьёсын. Студентъёс быдэстӥзы «Вӧсь нерге» (кудӥз люкамын Алнаш ёросысь Туймыйыл гуртын) но Ашальчи Окилэн кылъёсызъя но Николай Постниковлэн крезьгурезъя «Даур» кырӟанъёсты но куно пумитан гуртъёсты.

Валентина Емельянова