Сьӧлта ёросысь «Звезда» эштос элькунысьтымы одӥгез ӟеч ужась хозяйство

Гурт хозяйствоен быгатыса кивалтэ Сергей БАТУЕВ. «Звезда» СПК - голштин выжыысь пудо будэтонъя племпродуктор. Йӧл кысконзэ арысь аре йылэтэ, кылем арын чакламлэсь 11,5 процентлы тросгес люказы. Туэ арзэс но ӟеч мытӥзы.

— Гурт хозяйствоослы ноку капчи ӧй вал: я куазь люкетӥз, шуиськом, я закупочной дунъёс будо, я эшшо мар ке сюре. Малпай вал, кылем ар капчи ӧз йӧты шуыса, но туэен ӵошатыса, туж умой улӥськеммы-ужаськеммы вылэм. Лыдъям ни: йӧллы закупочной дунъёс усемен, барышмы ог 50 миллион манетлы кулэсмыны быгатоз. Угось огвакытэ 1 килограмм йӧлмылы 44 манет но сёто ни вал, али — ог 37 манет котыр. Но ум юскиськиське! Озьыен, эшшо тросгес йӧл поттыны тыршоно, — шуэ Сергей Иванович.

Хозяйствоын вуж фермаоссы ӧвӧл ни. Кылем арын выль родильной усьтӥзы. Но пудоез думылытэк возён понна эшшо бадӟым комплекс пуктэмзы потэ на.

- Йӧлмес кытчы карыны ум ёрмиське — ужаськом, заводъёсын меӵак огкылъёс гожтыса, - шуэ кивалтӥсь.

Туэ гужем вылтӥ Узи черкогуртын 10 корка ӝутӥськыны кулэ — соос гуртъёсты котыр ласянь азинтонъя программа чотын лэсьтӥськозы, хозяйство пуктӥськонлы 20 миллион манет висъяны чакла. 10 корка пӧлысь ӝыныез СПК-ысь специалистъёслы чакламын. 5-ез бушесь на.

- Ужасьёсмес ми дунъяськом кадь потэ. Арлы быдэ ик уждунзэс йылэтӥськом. Туж возьмаськом, палэнысь но дорамы лыктыны мылкыд карисьёс шедёзы шуыса. Умойгес, быдэс семьяен вуысалзы ке. Специалистъёсмы тырмыт, огшоры ужасьёс кулэ, уката но — пудо утялтӥсьёс, скал кыскисьёс, — ватса Сергей Батуев.

Елена Слащёва.

Туспуктӥз Ирина Игнатьева.