“Удмурт дунне” редакцие вуылӥз башкырт калык огазеяськонлэн азьветлӥсез Шагит Ишаев

 Шаерамы башкиръёс трос ӧвӧл: 2 но ӝыны сюрс пала — тамында мурт ассэ та выжые пыртӥз берло перепись дыръя.
— Литературной кылмы туж матын бигер кыллы, малы ке шуоно Башкортостанысь кӧня ке ёросъёсысь 5 поколение ини дышетскиз Казаньын поттэм учебникъёсъя, — шуиз Шагит Октябрович. — Но башкиръёс пӧлын вань бигеръёслы валантэм луись диалектэн вераськисьёс но — таосыз Урал сьӧрын уло.Уг луы меда вераны, башкыртъёс но бигеръёс куке-соку одӥг калык вылэм шуыса? Шагит Ишаевлэн таӵе юанэнымы соглаш кариськемез ӧз поты. Зэм но, тодосчиос но соосты нимаз калыкъёс пӧлы ик пырто. Башкыртъёслэн выжыоссы — вашкала тюрк выжыысь башгирдъёс. Соос кочевникъёс, кыралъёсын нимаз кариськыса улӥзы — ожъёс дыръя гинэ огазеяськылӥзы.— Ой, тодэ вал, кыӵе ческыт кумыс! — шуэ Шагат Октябрович. — Сое вал йӧллэсь чырсатыса лэсьто. Куд-огез али но сӥлез кумысэн ӟузьылэ. Башкириын вал возисьёс ӧжыт ӧвӧл. Куд-ог егит семьяос 100 йыр но вордо. Скалэн ӵошатыса, та животэз вордыны капчигес, угось лэзиськод кыралэ — соос асьсэ понна отын кӧттырмоназы сисько, собере берто.Башкырт семьяосын али сокем уг чаклало ни, пе, кыӵе выжыысь кен басьтозы яке эмеспи карозы — егитъёс ог-огзэс мед гинэ яратозы. Туала башкиръёс 2-3 кышно но уг возё ни. Нош вазен озьы ӧй вал. 

Элина Кумачева
Туспуктӥз Валентина Емельянова