«Вормон поезд» 3-тӥзэ вуоз Ижкаре

Со дугдылоз Ижысь чугун сюресъёсъя вокзалэ 15-тӥ, 16-тӥ мартэ. Поездын учкыны луоз Быдӟым ож вакытэз возьматӥсь экспозициосты.«Вормон поезд» туэ 6-тӥ арзэ ини котыръя Россиысь улосъёсты. Поездын 10 вагонъёс — соос возьмато Быдӟым ож кутскем дырысен Быдӟым Вормонозь вакытэз. 2023-тӥ арын ватсаса усьтӥськизы Нюрнбергын, Токиоын но Хабаровскын ортчем процессъёслы сӥзем экспозициос.«Вормон поезд»-ысь экспозициосты учкыны мылкыд карисьёслэсь куриськонъёссэс кутон усьтӥськоз 14-тӥ мартэ поездпобеды.рф. сайтын. Поездэз учкон понна регистрация пыр ортчоно. Сое ортчем бере адямилы электрон почтаяз ӧтён вуоз. Со ӧтёнэн дунтэк пырыны быгатэ 18 аресысен 1 адями 2 быдэ вуымтэ (6 аресысен 17 аресозь) пиналъёсыныз.
Туспуктэм: Тӧролэн но Правительстволэн пресс-службаез.