Президентлэн кичӧлтэмезъя пыӵась «Семья» нацпроект улсын туэ 3-тӥзэ радъяськоз «Азбука счастливой семьи» проект

Кызьы нылпиез валаны дышетсконо но соин огкыл шедьтоно, кызьы валаса нодъяно но урод сямъёслэсь утёно, кыӵе визь-кенеш сётоно быдэ вуон вакытаз — шаерысьтымы анай-атайёс ӵапак та юанъёслы валэктон шедьтыны быгато проектэ пыриськыса. Берло 2 ар ӵоже та школа пыр ортчизы ни элькунысьтымы 100-лэсь ятыр анайёс но атайёс. Соослы визь-кенешен юрттӥзы Быдэ вуымтэослы юрттонъя элькун центрысь специалистъёс. Соос урокъёссэс радъязы Удмуртилэн пӧртэм интыосаз. Озьы школа пыр ортчыны быгатӥзы городъёсысь но, ёрос центръёсысь но, гуртъёсысь но анай-атайёс. «Азбука счастливой семья» проект радъяське Калыклы улон-вылонын юрттон политикая но ужъя министерство, коммерциен вырисьтэм «Во имя семьи» огазеяськон юрттэмъя. — Шумпотымон: туэ но школаямы пыриськыны мылкыд карисьёс лачак люкаськизы. Пӧртэм интыосы потаса, ортчытыны малпаськомы 30 урокъёс. Соос нылпиосын герӟаськем ужпумъёслы сӥземын луозы, — шуиз Быдэ вуымтэослы юрттонъя элькун центрлэн кивалтӥсез Светлана Корепанова. — Паймымон но шумпотымон таиз но: арысь аре школаямы дышетскыны мылкыд карись атайёс тросгес но тросгес луо. Школаямы озьы нимаз урокъёс радъяськом пиналъёсты вордосэ басьтэм анай-атайёс понна.
Туспуктэм: Тӧролэн но Правительстволэн пресс-службаез.