Удмурт нылкышно писательёсын пумиськон ортчиз Сарапулысь «Электрон» культура юртын

«Данъяськом кышномуртэз» ӝытэ ӧтемын вал Удмуртиысь дано журналистъёс, писательёс Елена Миннигараева («Удмурт дунне» газетлэн валтӥсь редакторез), Лидия Нянькина («Кенеш» журналысь редактор-стилист), Галина Семенова («Удмурт дунне» газетысь «Ингож» приложение понна кыл кутӥсь).Пумиськон радъяськиз «Удмурт Кенеш» огазеяськонлэн Сарапул городысь ёзэзлэн, «Электрон» культура юртысь удмурт центрлэн кичӧлтэмезъя. Вераськон мынӥз нылкышно литература сярысь, чузъяськизы кылбуръёс, кырӟанъёс.Ужрадэз нуиз «Вуюись» ансамбльлэн хормейстерез, Сарапулысь удмуртъёслэн одӥгез азьветлӥсьсы Раиса Трофимова. Со вакчияк мадиз "Удмурт дунне" газетлэсь 110 аръем историзэ, вераз ужрадэ лыктэм куноос сярысь. Нош журналистъёс, писательёс веразы асьсэ творчествозы сярысь.Ужрад дыръя ик тау каронъёсын но кузьымъёсын пусъемын вал Сарапулысь трос нылпиё удмурт анайёс. Пинал будэтэм сяна, ваньзы ик соос удмурт ужрадъёсы мыло-кыдо пырисько.
Пумиськонэз шулдыртӥзы чебер кырӟанъёс, кылбуръёс. Ӝыт дыръя удмурт газет-журналъёслы гожтӥськыны, "Удмурт дунне" газетлэн историезлы сӥзем адӟытонэз учкыны, книга басьтыны луиз. Ужрад йылпумъяськиз удмурт кырӟан-эктонъёсын.Ӝытэз ортчытэмзы понна нимысьтыз тау шуиськом Сарапулысь «Удмурт Кенешлэн» кивалтӥсезлы Ольга Петровалы, активистлы Раиса Трофимовалы , «Электрон» культура юртлы но солэн директорезы Елена Шохиналы. 

Елена Слащёва.

Туспуктэмъёсыз Елена Миннигараевалэн.