Март толэзе Удмуртиын нылпиосты 1-тӥ классэ гожтон кутскоз

Дышетонъя но наукая министрлэн воштӥсез Тамара Ворожцова ивортэмъя, гожтӥськон азьвыл аръёсы сямен ик ортчоз — куриськонэз келяны луоз:
- Кун услугаосъя портал пыр,
- почта пыр,
- школае мыныса. Гожтӥськонлэн 1-тӥ люкетэз ортчоз 1-тӥ апрельысен 30-тӥ июнёзь. Заявлениез сётоно, нылпилэсь кытын улэмзэ лыдэ басьтыса. Кыӵе ульчаос, гуртъёс кыӵе школаос борды юнматэмын — 15-тӥ мартозь котькуд дышетон учрежденилэн сайтаз ивор пуктэмын луоз. 2-тӥ люкетэз кутскоз 6-тӥ июле. Йылпумъяськоз 5-тӥ сентябре. Соку заявлениосты кутозы, пиналлэсь прописказэ учкытэк.Гожтӥськон сюлмаськонъёстэк мед ортчоз шуыса, Т. Ворожцова дэмла:
 заявленилэсь черновиксэ Кун услугаосъя порталын азьлапал ик - 17-тӥ мартысен - дасяны.
 юанъёс кылдыку, жингыртоно "пӧсь телефонэ" - 122 номер ужаны кутскоз 17-тӥ мартысен.
 нылпиосты 1-тӥ классэ гожтон пумысен рос-прос тодыны быгатоды "Удмурт дунне" газетмылэн вуоно номерысьтыз.

Елена Слащёва
Туспуктэм: Дышетонъя но наукая министерстволэн "ВКонтакте" бамысьтыз.