Уг тырмо 190 специалистъёс

Кылем арысен шаерамы пыӵаны кутскиз пудо эмъян станциослы кадръёсын юрттонъя программа — отчы ужаны интыяськем специалистъёслы 150 сюрс манет подъёмной висъяське.
Миым уксё басьтӥзы 7 егит специалистъёс. Туэ, озьы ик вуоно ар понна соослы висъяськоз на быдэн 100 сюрс манетэн.
Туэ пудо эмъян станциосы интыяськыны малпало 13 выпускникъёс. Соос пӧртэм дышетсконниосысь. Кылсярысь, Удмурт аграрной кун университетын ветеринарлы дышетско 57 нылъёс но пиос. Со пӧлысь 5-ез — целевикъёс. Туэ диплом басьтэмзы бере ик соос уже интыяськозы. Пудо першаллы озьы ик дышето Можгаысь агропромышленной, Уваысь профессиональной колледжъёсын.
— Шаерысьтымы пудо эмъянъя станциосын уг тырмо 190 специалистъёс, — шуиз Удмуртиысь Пудо эмъянъя валтӥсь управленилэн кивалтӥсез Ирина Крылова. — Ветеринарлы дышетскись целевикъёсты син шорамы возиськомы, элькун бюджетысь быдэн 7 сюрс манетэн стипендия висъяськомы семестрзэс ӟеч сётэм студентъёслы. Миым та стипендиез басьтӥзы 40 студентъёс. 150 сюрс манет тыр подъёмнойёслы луыса арысь аре тросгес выпускникъёс ветстанциосы интыяськыны мылкыд каро.

Елена Слащёва.