Кык полэс праздник!

Татарстанысь Набережные Челны карысь удмурт лулчеберетъя йӧскалык автономилы но фольклоръя "Ӟардон" калык ансамбльлы - 30 ар. Солы сӥзьыса, 14-тӥ южтолэзе Набережные Челныысь Калыкъёслэн эшъяськон юртазы бадӟым праздник ортчиз.Котырес юбилеез пусйыны трос калык люкаськиз. Соослы шуныт кылъёссэс веразы Удмурт Элькунлэн Кун Кенешысьтыз депутат, "Удмурт Кенеш" огазеяськонлэн Тӧроез Андрей Ураськин, Татарстан Элькунлэн Кун Кенешысьтыз депутат, Татарстанысь калыкъёслэн Ассамблеязылэн Кенешезлэн быдэсъясь комитетэзлэн кивалтӥсез Ренат Валиуллин, Татарстанысь удмуртъёслэн лулчеберетъя йӧскалык автономизылэн тӧроез Алексей Арзамазов, озьы ик видео пыр саламзэс веразы удмурт Элькунысь Кун Кенешлэн тӧроезлэн воштӥсез Татьяна Ишматова, фольклор кырӟанъя но эктонъя "Айкай" кун театр.Вылӥ куноос пусйизы, автономилэн ёзчиосыз но "Ӟардон" ансамбле ветлӥсьёс удмурт калыклэсь данзэ, лулчеберетсэ, узыр сямъёссэ но йылолъёссэ утёнын, кырӟан-эктон гуръёссэ вӧлмытонын бадӟым уж нуо, удмуртлыкез калыке пыӵатонын лулысь-сюлмысь тыршо шуыса. Нош со ужез кутсконысеныз ини туж ӟеч быгатыса бергатэ Валентина Билык.Юбилееныды, эшъёс! Выль азинсконъёс!