Нош ик питыраз "Питыран"!

Якшур-Бӧдья ёросысь Мукши шор ёзо школаын тямысэтӥзэ ортчиз удмурт кыллы но лулчеберетлы сӥзем "Питыран" элькун фестиваль. Туэ со Россиысь калыкъёслэн огазе луэмзылэн арезлы сӥземын вал.Нырысьсэ покчи классъёсын дышетскись нылпиосын валче нылпи садэ ветлӥсь покчиос но пыриськизы. Нылъёс но пиос Якшур-Бӧдья, Пичи Пурга, Шаркан, Ува, Сьӧлта, Эгра, Балезино ёросъёсысь вуизы. Ужрадэ пыриськисьёслы ӟеч мылкыд сӥзизы Удмурт Элькунысь Дышетонъя но тодосъя министерствоысь этнокультуралы дышетонъя ёзлэн кивалтӥсез Александра Игнатьева, "Удмурт Кенеш" огазеяськонлэн Якшур-Бӧдья ёрос ёзэтэзлэн кивалтӥсез Вера Вахрушева.Пиналъёс котьку сямен пӧртэм творческой быгатонлыкъёссэс шараязы. Нырысь сцена вылын веразы-кырӟазы. Собере нимысьтыз секциослы люкиськизы, отын шудӥзы, суредазы, рольёсты шудӥзы, гуртысьтызы ваем сиёнъёсын утялтӥзы, асьсэлы синпелет, пичи Питыран, лэсьтӥзы.Со вакытэ ик дышетӥсьёс "Ужан песьтэрысьтым" секциын ужазы, куспазы визьнодан амалъёссы сярысь кенешизы.Ужрадэз радъязы - Якшур-Бӧдья ёросысь Дышетонъя управление, Мукши школа но Мукши культура юрт, Йӧскалык прессалэн юртысьтыз "Вордскем кыл" журналлэн редакциез.